Uribe Ospitalea herri-plataformak gogoratu duenez, bide hori "legearen kontrakoa" zela esan zuen udal-idazkariak, txosten batean, "Osteikoko Zati Plana onartu zenean bertokotzar jo arren, Urdulizko ospitalerako sarbidea izango denez, zalantzarik ez dagoelako udalerri bat baino gehiagori dagokiola horren ardura". Euren berbetan, "sopeloztarrei iruzurra egin nahi zaie Berangoko megapark-era eta ospitalerako bidean gure herria zeharkatuko duten milaka kotxeekin pozik gaudela sinestaraziz eta horrexegatik Urdulizera doan bide berri hori egin behar da Sopelako trafikoa arinagoa izan dadin".
Horrez gainera, 2016ko martxoko plenoan esandakoari "muzin" egitea leporatu diote Gontzal Hermosilla alkateari eta bere Gobernu-taldeari: "udal-osoko bilkura horretan Urdulizeko ospitaleak sortutako trafiko-arazoari alternatibak aztertzeko beharra aipatzen zen, horien inguruan prozesu parte-hartzaile bat bultzatuz". Horregatik guztiagatik, "manipulazio-kanpaina" bat martxan ipintzea egotzi diote Udalari.
EH Bilduren haserrea
Egunotan, informazio-orriak banatu ditu Udalak, sopeloztar denek parte hartzeko moduen eta daten inguruko informazioa izan dezaten. Era berean, Udalaren webgunean gune berezi bat zabaldu dute, erabiltzaileek beraien ekarpenak egin ditzaten, inprimaki baten bidez.
Ostera, Sopelako EH Bilduk haserrea agertu du EAJk eta PSE-EEk osatzen duten Gobernu-taldeak egindako galdeketagatik. Inkesta Gizaker enpresak egin zien 400 sopeloztarri, telefonoz. Koalizio ezkerzalearen berbetan, "herritarrak Urdulizko ospitalerako errepidea egitearen alde ipintzera bideratuta daude galderak". Aldi berean, etxez etxe banatzen dabiltzan informazio-orrietan "manipulazioa" igarri dela kritikatu du EH Bilduk. Besteak beste, hau aipatzen da: "Berangoko merkatalgunea laster zabalduko dute; trafiko-fluxua hobetuko du errepideak. Horrez gainera, Sopela eta Urduliz lotzen dituen errepideagaz bat egingo du, ospitalerako sarbidea bilakatuz". Ezkerzaleen berbetan, ordea, ez da "trafikoa areagotzearen daturik ematen".
Osteikoko errepideko tirabira ez da kontu berria: EH Bilduk proiektua geldiarazi zuen alkatetza bere esku zegoenean, "errepide horren bitartez, trafikoa asko handituko zelako udalerri osoan"; EAJk egitasmoari eutsi dio aginte-makila berriro eskuratzean.
