Euskararen Nazioarteko Eguna

Euskal sorkuntzaz gozatzeko aukera egongo da Sopelan

Sasoi denetako berrehun euskal kantaren baino gehiagoren zatiak agertzen dira Ez dok hiru! antzezlanean. © GUILLERMO CASAS - TARTEAN TEATROA

Abenduaren 3a Euskararen Nazioarteko Eguna denez, aste-akabu osoan hainbat ekitaldi antolatu dituzte, Sopelan. Ekitaldiak bariku honetan hasiko dira, abenduaren 1ean, eta domekan amaituko dira, hilaren 3an. Hala, aukeran egongo da zerez gozatu: bertsoak, antzerkia, dantzak... baita ezusteko ugari ere. Ospakizunei hasiera emateko, musikariek lagundutako bertso-jira egingo dute bihar, Sopelako tabernetatik tabernara. Hitzordua 19:30ean ipini dute.

Biharamunean, berriz, "Ez dok hiru!" antzezlanaz gozatzeko aukera egongo da, Kurtzio kultur etxean. Hala, Tartean konpainiako Patxo Telleria eta Mikel Martinez igoko dira oholtza gainera, eta hiru musika-aktorek lagunduko dituzte: horien artean dago Maria Arriaga algortarra. Emanaldia 20:00etan hasiko da, eta sarrerak 8 euroan salduko dituzte, ohiko lekuetan. Telleriak eta Martinezek urteak daroatzate bikote legez artista-jardunean, antzerki-obrak sortzen, ekoizten eta antzezten. Denboragaz, ia oharkabean, berezko estiloa sortu dute: iturri askotatik edaten dute, baina, berezko kaligrafia dauka: aktore biren elkarrizketan oinarritzen da, berbaldi labur eta pikatuak, azkarrak, eroak... "Ez dok hiru!" antzezlanari dagokionez, euskal kantutegian oinarritutako teatro-ikuskizuna da: "Gure modukoa: eroa, harrigarria, irrigarria azalez... Baina azal horren poro bakoitzari gure musikarekiko maitasuna dario", diote Telleriak eta Martinezek.

Euskararen Nazioarteko Egune­ko Sopelako egitaraua domekan bertan amaituko da: orduan, Edu Muruamendiarazek zuzentzen duen Aukeran Dantza Konpainiak "Maurizia" ikuskizuna taularatuko du, Kurtzio kultur etxean. Karmele Jaio euskal idazleak sortutako testu batean oinarritzen da lana; Maurizia Aldeiturriaga zeberioztar pandero-jolea zenaren bizitzan dauka abiapuntua. Emanaldia 19:00etan izango da; sarrerak 8 euroan salduko dituzte.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun