Sopelako EH Bilduk udal-batzorde kopurua murriztu gura du; "izan ere, legegintzaldi honetan komisioek ez dute eduki nabarmenik, lantzen diren gaiak oso gutxi dira eta ez da gai horietan sakontzen", ezkertiarren arabera. "Komisioen kopurua murriztuz, Sopelak kostuetan aurreztuko luke, zehazki, zinegotziei ordaindu beharreko ordainsariak batzar horietara joateko", gaineratu dutenez.
Bestalde, EH Bilduk komisioak publikoak eta irekiak izan daitezen eskatzen du. "Horrela, edozein sopeloztar batzar horietara joateko aukera izango luke, libreki entzutera zein bere iritzia ematera", aipatu dutenez.
Hala ere, "hain garrantzitsuak diren mozio horiek" erregu legez sartu ditu Gontzal Hermosilla alkateak, EH Bilduren proposamenak "zentsuratuz eta gutxietsiz". Ezkertiarrek kritikatu dutenez, "ez da hau gertatzen den lehenengo aldia eta ez da azkena izango". Sopelako EH Bilduren berbetan, "beste behin ere, alkateak eta bere EAJ/PSE udal gobernuak osoko bilkura eduki gabe utziko dute eta horrela, sopeloztarrok batzorde informatiboetara joatea galaraziko dute. Aski da!".
