Udal-hauteskundeak 2019

Elkarrekin Podemosen hautagaitza aurkeztu dute maiatzeko udal-hauteskundeetarako

© EQUO BERDEAK

EAE osoan hiru alderdiek egindako akordioaren ildotik, Ahal Duguk, Ezker Anitza-IUk eta Equo Berdeak-ek bat egin dute Sopelan ere, Elkarrekin Podemos izenagaz koalizioan aurkezteko maiatzaren 26ko hauteskundeetara. Manuela Ruiz Vivanco da zerrendaburua.

Domeka eguerdian Udaletxeko plaza egindako ekitaldian, Elkarrekin Podemosek Sopelarako duen programaren oinarrizko ardatzak ezagutarazi zituen: Zipiriñe eta Iberre ikastetxeetako arazoa konpontzea, etxebizitza soziala, enplegua, jasangarritasuna, herritarren parte-hartzea, euskara, gardentasuna eta berdintasuna.

"Bestelako herri-eredu bat" lortu gura dutela adierazi zuten koalizioko kideek, "pertsona guztiekiko eta ingurumenarekiko errespetua duena". Udalaren baliabideak bestela kudeatzearen aldeko apustua ere aldarrikatu zuten, politika sozialei ahalik eta garrantzirik handiena emanez, krisiak kolpatutakoei laguntzeko.

Bestalde, sopeloztar denek udalaren bizitza publikoaren parte-hartzaile aktibo izan daitezen mekanismoak sortzeko beharra azpimarratu zuten aurkezpenean.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun