EH Bilduk azpimarratu egin du Udalak emango duen 40.000 euroko diru-laguntza euren ekimenez aurreikusi zela 2017ko aurrekontuetan (ordutik hona kopurua handitu ez dela nabarmendu badute ere), eta adierazi du urte hartako aurrekontuetan etxebizitza hutsak identifikatzeko azterketa bat egiteko 15.000 euroko gastua ere onartu zela, baina hori ez dela oraindino egin.
Azterketa horren bidez, Sopelako etxebizitza hutsak zeintzuk diren jakin, euren ugazabakaz harremanean jarri eta etxebizitza horiek premia duten sopeloztarrei alokairuan eskaintzea sustatu gura zen, koalizioaren esanetan. Ildo horretan, etxebizitza hutsak alokatu ahal izateko maiatzeko hauteskundeetarako aurkeztutako programan hainbat neurri (Eusko Jaurlaritzako Alokabide zerbitzuaren bitartekaritza eta guzti) proposatu zituztela gogorarazi dute, eta horregaz batera, etorkizunean eraikiko den Abaroko gunean babes ofizialeko etxebizitza gehien kontzentra dadila eskatu dute.
"Gazteei bakarrik ez, 'bizitzeko' (berbaren esangura literalean) zailtasunak dituzten beste kolektibo batzuei eta orokorrean herritar denei etxebizitza eskuratu ahal izatea erraztea da helburua", gaineratu du EH Bilduk.
