COVID-19aren ondoriozko egoeran "udalerriko sare ekonomikoak dituen beharrak eta arazoak identifikatzeko", enpresa-prospekziorako programa bat ipini du abian Udalak. Pandemiaren kalte ekonomikoak gutxitzeko neurriak planifikatzea da helburua; "ezinbestekoa da administrazioaren, saltokien, enpresen eta negozioen arteko lankidetza", adierazi du Teresa Fernández Enplegu eta Sustapen Ekonomikoko zinegotziak, "horrela lortuko baitugu krisi-egoera ahalik eta modu onenean gainditzea".
Datozen egunetan diagnostiko-lan hori egiten hasiko dira Udalak kontratatutako langile espezializatuak. Sektore guztietako enpresa eta negozioakaz jarriko dira harremanetan, telefonoz edo posta elektronikoz, eta haien proposamenak jasoko dituzte, "Udalari laguntzeko jarduera ekonomikoa berreskuratzeko eta ondoren horri eusteko neurriak hartzen". Datuak eskuratu ostean, Sopelako enpresa-sektoreakaz lan-mahaiak antolatzea aurreikusten dute.
Esan bezala, negozio eta enpresa guztien laguntza izatea oso garrantzitsua dela uste du Udalak. Hartara, interesa dutenei harremanetarako bide hauek eskaintzen dizkiete:
- Telefonoz: 94 406 59 00 (110 luzapena)
- Posta elektronikoz: empleo@sopela.eus
