Sopelbus zerbitzua bertan behera utzi izana salatu dute

© SOPELAKO UDALA

Sopelako udal-gobernuak, aldebakarreko erabakian, Sopelbus zerbitzua eten duela argitaratu du sopela.net webguneak gaur. Agerkari horrek dioenez, gaia ez da osoko bilkuran eztabaidatu, eta ez dator bat 2020ko aurrekontu-akordioagaz, "non Sopelbusentzat 250.000 euroko partida aurreikusten zen". Zerbitzua martxoaren 27tik dago etenda.

Sopela.net-en irakur daitekeenez, EH Bilduk osoko bilkuran galdetu zuen Sopelbus bertan behera geratu izanaz, eta udal-gobernuak erantzun zuen osasun-krisiaren ondorioz ez duela denborarik edukiko zerbitzua lizitaziora ateratzeko, eta udan zerbitzua esleitzea ezinezkoa dela. EH Bilduren ustez, "aitzakia hutsa" da hori, "Udalaren zerbitzuak eta sailak ez baitira behin ere gelditu". Gainera, apirileko osoko bilkuran Sopelbuserako Barik txartela erabili ahal izatea erabaki zela kontuan izan beharra dago, koalizioaren esanetan.

"Sopelbus zerbitzu defizitarioa da, baina sozialki errentagarria" adierazi du EH Bilduk. Zerbitzua 2009tik egon da martxan, sopela.net-ek gogoratu duenez: "EAJ alkatetzan zela hasi zen, eta 2011n, EH Bilduren eskutik, zerbitzua urte osoan luzatu zen. Orain arte, nahiz eta zerbitzu errentagarria ez izan, beti mantendu da bere gizarte-zerbitzuagatik". Besteak beste, Arriateratik eta Sopelmarretik metrora hurbiltzea erraztea eta udan hondartzara joateko aukera ematea aipatu dituzte, zerbitzuaren abantailen artean.

Erlazionatuak

Sopelbus zerbitzua, martxoaren 27tik bertan behera

Sopela

Ohar labur baten bidez, Sopelako Udalak jakinarazi du barikutik aurrera Sopelbus zerbitzua etengo duela, Espainiako Estatuan ezarrita dagoen alarma...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun