Pobrezia energetikoari aurre egiteko dirulaguntzak emango dituzte

Sopelako Udalak zailtasunak dituzten familientzako beste dirulaguntza baten deialdia zabaldu du, aurreko egunetan elikagaiak eta eskola-materiala erosteko laguntzen berri eman ostean. Oraingoan, pobrezia energetikoa jasaten dutenen artean 15.000 euro banatuko dituztela iragarri dute.

"Azkenaldian energia nabarmen garestitu dela jakinik, ohiko etxebizitzaren energia-hornidurarako 2020an egindako gastua estaltzea" izango da dirulaguntzaren helburua, Udalak azaldu duenez. "Sopelako zenbait etxebizitzatan diru-sarreren zati handiegia erabili behar dute energiaren faktura ordaintzeko, eta horrek zuzenean eragiten die beren bizi-baldintzei", zehaztu du Teresa Fernandez Enplegu eta Ekonomi Sustapen zinegotziak.

Eskaera egiten duen pertsona guztiek Sopelan erroldatuta egon beharko dute, gutxienez urtebeteko antzinatasunagaz eta etenik gabe. Gainera, familia-unitatea etxebizitzan bizi diren pertsona guztiek osatuko dute (biztanleen erroldaren bitartez ziurtatuko da). Dirulaguntza emanaldi bakarrean ordainduko da eta eskatzaile bakoitzak eta elkarbizitza-unitate bakoitzak 400 euro jasoko ditu gehienez.

Eskariak aurkezteko epea urriaren 15etik 28ra egongo da zabalik. Eskari-orria eta deialdiaren oinarriak Bizkaiko Aldizkari Ofizialean argitaratuta daude daborduko, eta interesdunen eskura daude Udalaren webgunean eta udal-bulegoetan. 

Erlazionatuak

Udalak dirulaguntzak emango ditu elikagaiak eta eskola-materiala erosteko

Sopela

Zailtasunak dituzten familientzako dirulaguntza bi iragarri berri ditu Sopelako Udalak. Batetik, 16.000 euro bideratuko dituzte pandemiaren ondorio...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun