Gaur goizean erregistratu du Denok Batera taldeak Josu Landaluze Sopelako alkatetzatik kentzeko zentsura-mozioa, momentuz zinegotzi bik sinatuta; Jon Gerediaga mozioaren bultzatzaileak berak, eta Patricia Alfonso, Elkarrekin-Podemosek dituen bi zinegotzietako batek.
Testuan irakur daiteke Unai del Burgo EH Bilduko zinegotzi eta koalizioak alkatetzarako aurkeztu zuen hautagaiari kargu hori emateko proposamena egin dutela sinatzaileek. Dokumentuan ikusten denez, oposizioko zinegotzi denen izenpea jasotzea da mozioa sustatu dutenen asmoa, baina oraingoz atxikimendu bakarra lortu dute.
"DB-TUk gonbidapena egin izan die Ezker Anitzako zinegotziari eta EH Bildukoei zentsura-mozio hau babestu eta sina dezaten", azaldu du Denok Baterak; "hala egitea erabakitzen badute, hamar egun barru alkatea eta gobernua aldatu egingo dira Sopelan". Atzo adierazi genuenez, HIRUKAk ez du jaso oraindino EH Bilduren eta Elkarrekin-Podemosen iritzirik gai honen gainean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
