"Zentsura-mozioaren atzean ez dago ez formarik, ez edukirik", dio Sopelako EH Bilduk

© SOPELAKO EH BILDU

Sopelako EH Bilduk ez du bat egingo DB-TUk Josu Landaluze Sopelako alkatearen aurka aurkeztutako zentsura-mozioagaz. "Ez da proposamen serioa", adierazi du koalizioak, "ez dago programarik, ez dago konpromisorik, ez dago elkarlanean aritzeko borondaterik, ez dago behar besteko konfiantzarik". Gaineratu dutenez, "Elkarrekin Podemosekin batera oposizio bloke sendoa eraikitzeko eskaintza egin diogu DB-TUri, alternatiba sendoa, aurrerakoia eta eraldatzailea osatzeko asmoarekin".

Hau da , hitzez hitz, EH Bilduk gai honen gainean adierazitakoa:

"Azaroaren 17an argitaratu du sare sozialetan DB-TUk EH Bilduri egin dion zentsura-mozio proposamena. Azken bi hilabeteetan bi aldiz egin digu DB-TU alderdiak proposamen bera, lehena irailaren 15ean eta bigarrena azaroaren 7an. Bi aldi horietan erantzun berbera eman genion DB-TUri, eta oraingoan ere, erantzun berbera emango diogu. EH Bilduren oinarri sozialaren artean zabaldu genuen erantzun hori, azaroaren 12an egindako herri-bilera batean. Oraingo honetan, sopeloztarren artean zabalduko dugu:

1. Osasun-, ekonomia- eta gizarte-krisiaren egungo egoeran, gizarteak erantzun serioak eskatzen ditu garai zalantzagarrietan eta ziurgabetasun gabeko hauetan. Egungo egoeraren aurrean, erantzukizunez jokatu beharra dago, mahai gainean jartzen diren alternatiba bakoitza lasaitasunez eta sakontasunez landuz. Ez da inprobisazioetarako garaia. DB-TUren proposamenak ez du baldintza hori betetzen. Ez da proposamen serioa.

2. DB-TUren zentsura-mozioaren atzean ez dago ez formarik, ez edukirik. Mozioaren atzean ez dago akordiorik programa zehatz bati buruz eta ez dago erantzukizunik hartzeko borondaterik DB/TUren aldetik. Horrelako proposamen batek arrakasta izateko, oraindik ehundu gabe dauden elkarrekiko konfiantza eta lankidetza egon behar dira. Ezin da ahaztu DB-TUk birritan eman diola udal-gobernua EAJri, kontaezinak izan direla haien jarrerak eta gureak elkarrengandik urrun egon diren aldiak eta gaiak, eta kontutan hartu beharra dago ere bi legegintzaldietan izan ditugun kontaktu urriak.

3. Elkarrekin Podemosekin batera oposizio bloke sendoa eraikitzeko eskaintza egin diogu DB-TUri, alternatiba sendoa, aurrerakoia eta eraldatzailea osatzeko asmoarekin. Alternatiba sendoak konfiantzazko harremanetan lantzen direlako, eta horretarako elkarlana beharrezkoa da. EH Bilduk pausuak eman ditu norabide horretan: DB-TUrekin izandako iragan polemikoa alboratuz, urriaren 17ko herri-batzarrean Sopelako oposizioko udal taldeekin (DB-TUrekin ere bai) elkarlanean aritzeko borondatea agertu genion gure oinarri sozialari.

DB-TUk kalera atera duen proposamen honekin, zalantzan jartzen du bere elkarlanerako benetako borondatea. Izan ere balizko zentsura-mozio bat aurkeztea hiru alderdien arteko ekimena izan beharko litzateke, aurretik elkarrekin adostuta eta ez ordea alderdi bakar batek aurkeztua (hirukotetik bozka gutxien duen alderdia, gainera).

EH Bilduk bere lan-ildoa gauzatzen jarraituko du, kanpo inposaketarik gabe, modu arduratsu, proposatzaile eta kritikoan. Oposizioko taldeekin ez ezik, Sopelako eragile sozial, kultural eta sindikalekin elkarlanean arituko gara, Sopelarentzat alternatiba sendoa, aurrerakoia eta eraldatzailea eraikitzeko asmoarekin"

Erlazionatuak

Sopelako alkatearen aurkako zentsura-mozioa aurkeztuko du Denok Batera taldeak

Sopela

Josu Landaluze (EAJ) Sopelako alkatearen zentsura-mozioa baten aurkako testua argitaratu du Denok Batera (DB-TU) taldeak sare sozialetan. Indar pol...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun