"Kalea behin betiko berrantolatzeko" parte-hartzezko prozesua gauzatu bitartean, Sopelako Udalak oinezkoei lehentasuna eman die Eleizalde kalean, eta orain arte bertan zeuden aparkalekuak kendu ditu, zatitxo batean izan ezik (argazkian ikus daitekeena; 17:00ak arte zama-lanetarako bakarrik erabil daiteke). Gainera, terraza egokitu dute Erroia tabernan. Bertako ugazabek 1.800 sinadura batu zituzten orain aste batzuk, Udalak terraza ipintzeko baimena ematearen alde.
"Oinezkoen segurtasuna areagotzeko eta inguruko bizilagunen eskarietako bat errealitate bihurtzeko, Eleizalde kalea (Landa Doktorearen bidegurutzeraino) behin-behinean oinezkoentzako alde bihurtzeko lanak amaitu ditugu", adierazi du Udalak. Kontuak kontu, bertan autorik utzi ezin den arren trafikoak lehen bezala jarraitzen du (abiadura oinezkoenera mugatuta, hori bai), Landa Doktorea kalera eta Eleizalden bertan dagoen garajera ailegatu ahal izateko.
Izan ere, oinezkoek eta garaje horren erabiltzaileek lehentasuna dutela adierazteko seinaleak ipini dituzte asteotan, eta aparkatzeko hamar leku inguru kendu dituzte. Era horretan "erdigune lasaiago, iraunkorrago eta seguruago baten aldeko apustua" egiten dela aldarrikatu du Udalak: “Udalerriko hainbat gunetan mugikortasuna hobetzeko egiten ari garen azterketaren baitan kokatzen den neurrietako bat da. Proiektu pilotua da, behin-behineko jarduketa".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
