Espainiako Poliziak 3 sopeloztar atxilotu ditu gaur goizean, eta beste herritar baten etxea arakatu dute. Ustez, udalerrian joko aretoek sortzen duten miseria salatzeagatik atxilotu zituzten. Arrastian aske geratu dira, baina, hala ere, atxiloketak salatzeko elkarretaratzea egin dute Sopelako udaletxeko plazan.
Atxilotutakoak goiz osoa eman dute gatibu, baina arrastirako aske utzi dituzte. Lekukoek azaldu dutenez, operazioa Espainiako Poliziak burutu duen arren, aurretik daborduko prozedura judizial bat irekita zegoen, Ertzaintzak abiatutako ikerketa baten ondorioz.
Atxiloketak salatzeko, elkarretaratze jendetsua egin dute Sopelako udaletxearen aurreko plazan. Mota horretako operazioek borroka eta antolakuntza "kriminalizatzea" helburu dutela eta herri mugimenduaren kontrako "zuzeneko erasoa" izan dela nabarmendu dute.
