15 egun pasa dira Sopelako Udaleko eta hezkuntza-komunitateko ordezkariak Eusko Jaurlaritzako Hezkuntza Saileko arduradun nagusiakaz bildu zirenetik. Hezkuntza Sailak apirilaren 29an beste bilera bat proposatu zien, Eusko Legebiltzarrerako hauteskundeen ondoren, hain zuzen. Horren aurrean, Zipiriñeko Ikasleen Guraso Elkarteak salatu du konpromisoak saihestu gura dituztela hauteskundeak igaro arte. Horregatik, apirilaren 12an elkarretaratzea antolatu dute Sopelako udaletxeko plazan, zarata egiteko objektuak eramateko deialdiagaz batera.
Hauteskunde-kanpaina bete-betean, Eusko Jaurlaritzako Hezkuntza Sailaren jokabidea kritikatu du Zipiriñeko Ikasleen Guraso Elkarteak: "Dagoeneko badituzte baliabideak, lurra, dirua; falta dena da borondatea eta zintzotasuna gu engainatzeari uzteko".
Hala, herritar guztiak gonbidatzen dituzte apirilaren 12ko elkarretaratzera, zarata egiteko objektuakaz lagunduta euren mezua Sopelako udaletxe guztian zehar zabaltzeko asmoagaz. "Gure botoa lortu nahi duenak irabaz dezala!", nabarmendu dute.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
