Zipiriñe eskolako eta Sopela BHI institutuko gurasoek Sopelako Auzo Alternatibari eskatu diote euren beharrak entzuteko

Nahia Martinez Gondra 2024ko ots. 1a, 10:57
Ikastetxeetako toki gabezia horri "berehala" aurre egingo dioten konponbideak behar dituzte gurasoek.

Hezkuntza publiko integrala jasotzeko eskubidearen aldeko kontzentrazioa egin zuten atzo Zipiriñe eskolako eta Sopela BHI institutuko guraso-elkarteek. Hala, deitoratu dute ikastetxeak "masifikatuta" daudela eta ezinbestekoa dela haiek handitzea, izan ere, Zipiriñen 900 ikasle baino gehiago daude eta Sopela BHIn, 400. Irtenbide errealista bakarra Abaro sektoreko lurzatia erabiltzea dela adierazi dute, eta horretarako, beharrezkoa ikusten dute Sopelako Auzo Alternatibak jarritako errekurtsoa atzera botatzea.

Guraso-elkarteak salatu duenez, Eusko Jaurlaritzak epe ertain-luzean proposatzen dituen proposamenak alde batera utzita, arazo horri "berehala" aurre egingo dioten konponbideak behar dituzte: "Masifikatu gabeko kalitatezko instalazioez gozatu ahal izatea beharrezkoa da, liburutegiak, gela espezializatuak edo aisialdirako guneak bezalako baliabideakaz". Gainera, Sopela BHIn DBH ikasi nahi duten ikasle guztiei lekua egitea eta udalerrian Batxilergoa ikasi ahal izatearen beharra azpimarratu dute.

Nabarmendu dutenez, toki gehiago izateko egun duten irtenbide errealista bakarra Abaro sektoreko alboko lurzatia erabiltzea da. "Horrek aukera emango luke ikastetxea arintzeko eta ikastetxe batzuei irtenbide partziala emateko", baieztatu dute. Halaber, Sopelako Udalak beharrezko izapideak egin ditu lursail hori Eusko Jaurlaritzako Hezkuntza Sailaren esku uzteko eta lan egiten hasteko lursailak aldez aurretik okupatu ahal izateko. "Baina SAAk jarritako errekurtsoak prozesu osoa geldiarazten du de facto, eta proiektu horregaz aurrera egitea eragozten du. Horregatik guztiagatik, berriz ere eskatzen diogu Sopelako Auzo Alternatibari Gobernu Taldea eta hezkuntza-komunitate osoa entzuteko, eta behingoz kentzeko ikastetxe horietako ikasle guztien familiei itxaropena ematen zien plan desiratua bertan behera uzten duen baliabide hori", nabarmendu dute.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun