Nolakoa izan zen Barinatxeren sorrera?
Txistu irakaslea naiz eta Barakaldotik Sopelara bizitzera mugitu nintzenean herrian txistu klaseak ematen hasi nintzen nire etxean. Horrela, denbora batera ume gehiago hartzen hasi nintzen eta elkartea sortu nuen. Beste herriakaz kolaboratzen hasi nintzen: Algorta, Plentzia, Erandio, Barakaldo... Adin guztietako kideak gaude egun; gazteenek 16 urte dituzte eta zaharrenek 70 urte inguru.
Nola aldatu da taldea urte hauetan?
Egun, hiru traje ezberdin ditugu eta beste era batzuetan antolatzen gara. Denbora luzea daramagunez batera, gazteek ere badakite euren artean planifikatzen. Musika Eskolara etortzen dira, beraz, formakuntzan jarraitzen dugu eta gure oraingo kalitatea askoz hobea da. Halere, gero eta ume gutxiago datoz: gaur egun haurrek ez dute txistua jo nahi.
Zergatik uste duzu ez dutela txistua ikasi nahi?
Bada, ez dakit. Uste dut ziklikoa dela. Musika Eskolan segun eta urtea jende guztiak ikasi nahi du gitarra jotzen, hurrengo urtean biolina... aldatzen doa. Baina egia da apur bat gelditu dela txistura datorren ume kopurua. Halere, hasi ginenok berton jarraitzen dugu, beraz oraindino jendea dago txistuaren munduan.
Apirilaren 20an 25 urte bete zenituzten. Nola ospatu zenuten urteurrena?
Txistulari-ibilbide bat egin genuen Larrabasterratik goizeko 10:00etan. Gero, 11:30ean Sopela osotik egin genuen ibilbidea, Bizkaia osoko 70 txistulari elkartuz. Gainera, 5 txistu baxu egon ziren, normalean ez direnak egoten, oso txistu bereziak baitira. Udaletxean alkate eta zinegotziakaz batera Barinatxeren istorioa kontatu genuen, eta gero, omenaldi bat egin genien gure elkartean 25 urte hauetan hil diren hiru lagunei. Horregaz batera, partitura bat ere jo genien plegariagaz, ekitaldi handietan jotzen den musika. Horren ostean, beste ibilbide bat egin genuen Musika Eskolara heldu arte eta bertan mokadutxo bat jan genuen, argazki erakustaldi bategaz lagunduta.
Oso pozik gaude, herriko jende asko hurbildu eta zoriondu gintuztelako. 70 txistulari ikustea jotzen kaleetatik oso zirraragarria da. Denok joan ginen urteurrenerako sortu genuen zapi bategaz, eta zuriz jantzita. Hori oso hunkigarria da.
Bukatzeko, zer da zuretzako Barinatxe Txistu Taldea?
Niretzako nire bizitza da. Dauden kide asko 8 urte zituztenetik ezagutzen ditut, eta egun 32 dituzte. Beraz, familia bat gara. Batzuetan pintxo-potea hartzeko elkartzen gara jende gehiagogaz batera. Orain 30 urteak betetzeko eta horiek ospatzeko prest gaude! Oso hunkigarria da hainbeste jende biltzea eta txistua ahazten ez dela ikustea.