Sopelako aurrekontu parte-hartzaileen prozesua 2024ko maiatzean abiatu zuen Udalak, horretarako 200.000 euroko zuzkidura onartuz. Ekainaren 11tik uztailaren 8ra bitartean, herritarrek Udalari aurrekontuetan sartzeko proposamenak egiteko tartea ireki zen. Proposamenak bide desberdinetatik egin dira: bi auzo bileretan, online bidez, aurrez aurre hainbat lekutan jarritako postontzien bidez, Zipiriñen, Iberren eta Ikastolan, ludotekan eta gaztelekuan egindako saioen bidez ere bai. Guztira, 576 proposamen egin dituzte sopeloztarrek.
Ondoren, abuztuan zehar proposamen guzti horien balorazio tekniko eta ekonomikoa egin zuten udaleko teknikariek, 50 proiektuk aurrera eginez. Irailaren bigarren astean, ordea, herriko eragileen ordezkariez osatutako Berme Batzordeak 23 proiektu lehenetsi zituzten, honako irizpide hauen arabera: (1) Herritarren irisgarritasuna bermatzea. (2) Herri izaera, euskal kultura, hizkuntza eta nortasuna bultzatuko duten proposamenak izatea. (3) Ingurugiroa eta ingurumena zainduko dituzten proposamenak izatea.
Udalak gogorarazi du bozka baliozkoa izateko derrigorrez 5 proiektu aukeratu behar direla. Informazio guztia webgunean dago eskuragarri, hemen sakatuta.
