Plan hau kirolaren ikuspegi zabal eta integratzailetik abiatzen da. Horrela, gizarte-kohesioa, herritarren osasuna hobetzea eta tokiko ekonomia sustatzea helburu duen jardueratzat hartzen da kirola egitea, eta eginkizun pedagogiko eta hezitzaile garrantzitsua du. Horrela, planaren arabera, misioa da herritar guztien ongizatea hobetzea, bizitzan zehar kirol osasungarria eta afektiboki atsegina eginez.
Ikuspegi gisa, adin guztietako sopeloztar guztiek egunero kirolaz gozatzea lortu gura da, kantitatea, kalitatea eta kirolarekiko atxikimendua handituz. Ikuspegi hori lortzeko, beharrezkoa ikusten da udal-antolaketa hobetzea, instalazioak modernizatzea, naturaguneak hobeto aprobetxatzea, zerbitzuen eskaintza handitzea, baliabide ekonomikoak eta giza baliabideak handitzea ingurune seguru, osasungarri eta iraunkor batean. Hori guztia honako balio hauekin: parte-hartzea, berrikuntza, iraunkortasuna, berdintasuna, aniztasuna, euskararen sustapena, gardentasuna, zintzotasuna, kalitatea, errespetua, pasioa, talde-lana, erabiltzailearenganako orientazioa, erantzukizuna.
Herriak kirol-eremuan dituen ahuleziak, mehatxuak, indarguneak eta aukerak aztertu ondoren, planean 5 hobekuntza-alor eta 34 ekintza identifikatu dira: udalaren kirol-zerbitzuaren antolaketa, kirol-instalazioen egoera, kirol-eskaintza, kirol-elkarteekiko harremana eta eskola-kirola. Hobekuntza-arlo guztietarako zeharkako ardatz gisa, gai nagusiak proposatzen dira, hala nola irisgarritasun unibertsala eta kirol-jardueran euskararen erabilera bermatzea.
Gobernu taldeak plan horren diseinuan eta onarpenean dagoen adostasun zabala azpimarratu zuen, EH Bilduk, Elkarrekin Sopelak, EAJ/PNVk eta PSE-EEk 2024ko aurrekontu akordioan adostutako proiektua baita.
“Kiroldegiaren egungo kudeaketa-ereduaren mesfidantza gainditzea”
Bertaratutakoen artean interes berezia izan zuen “kiroldegiaren egungo kudeaketa-ereduaren mesfidantza gainditzeko” ekintzak, egungo BPXport enpresa emakidadunari dagokionez.
Sopelako kirol-eremuaren diagnostikoan “egungo enpresa esleipendunarekin emakidaren jarraitutasunaren bideragarritasunari buruzko zalantzak aipatzen zirenez, kontratu-betebehar batzuk (inbertsioak) betetzeko atzerapena dela-eta”, planak bi aukera aipatzen ditu: egungo kontratuan doikuntzak dituen emakidari eustea (bideragarritasun-plan berri bat idaztea, doikuntzak negoziatzea eta adostea, kontratuaren aldaketa inplementatzea) edo BPXportegaz egungo kontratua deuseztatzea (bideragarritasun-plan berri bat idaztea, adostasunez deuseztatzea negoziatzea jarraipeneko “zubi” modu bat inplementatzea, baldintza-agiri berriak idaztea emakida berri baterako, zerbitzuaren esleipenerako edo emakidarako).
Gobernu-taldeak aurreratu zuen urrian formalki eskatu ziola BPXporti kontratuan aurreikusitako inbertsioen alternatiba bat, enpresa emakidadunak azaroan aurkeztu zuela plan berria, eta udal-teknikariek plan alternatibo hori berrikusi ondoren, berriro eskatu zaiola enpresari gai jakin batzuk aztertzeko dokumentazio osagarria, hala nola bideragarritasun ekonomikoa, kirol-egokitasuna, egungo kontratua aldatzeko justifikazioa, etab. Une honetan, azken informazio hori jasotzeko zain dago Udala, planak adierazten dituen bi aukeretako bat aukeratzeko.
Kirol mahaia
Ekitaldira bertaratu zirenek, gehienak udalerriko kirol-taldeetako kideak eta Sopelako kiroldegiko langileak, planak jasotzen dituen 34 ekintzei buruzko informazio gehiago eskatu zuten.
Sopelako Udalak, material guztia Udalaren webgunean eta Udalean eta Kurtzion paperean eskuragarri uzteaz gain, azpimarratu zuen ekintza zehatzetako bat kirolaren mahaia sortzea dela, Kirol Plan Estrategiko honen garapenean herritarren eta kirol-eragileen parte-hartzea erraztuko duen sektoreko foro bat. “Orain prozesu horri amaiera eman behar zaio eta beste bide bati ekin. Gure bidelagunak izan zaitezten eskatzen dizuegu”, adierazi zien Guruzne Carrasson alkateak ekitaldira bertaratu ziren kirol-agenteei.
