Egungo udal-gobernu taldea Eusko Jaurlaritzagaz harremanetan hasi zen 2024ko urtarrilean aurreko legealdian birpartzelazioaren eta eremu hori urbanizatzeko betebeharren inguruan sortutako indeterminazio egoera desblokeatzeko helburuagaz.
Industria eta Ondare Sailek konpromisoa hartu dute Udalaren eta Eusko Jaurlaritzaren arteko komunikazio eta elkarlanerako bide erregular bat irekitzeko, prozesua modu egokian bideratzeko eta, horrela, beharrezkoak diren urbanizazio-lanak egitea bermatzeko. Jarduera horiek oinezkoak espaloietan zehar segurtasunez ibiltzea bermatuko du, gaur egun ez baitago horrelakorik.
Abenduan, Udalak IATren instalazioak lehenengoz okupatzeko eta erabiltzeko baimena eman zuen. Erabaki hori Eusko Jaurlaritzako Ondare Zuzendaritzari helarazi zioten bi aldeek abenduan bertan egin zuten bileran. Udalak administrazio aktibazio hori egin eta Eusko Jaurlaritzak hartutako konpromisoen ondoren, IAT geltoki berria martxan jarri da.
Guruzne Carrasson alkateak “positibotzat” jo du instalazioa irekitzea: “Sopelan ez ezik, eskualde mailan ere aldarrikatu beharreko lorpena da gaurkoa irekitzea. Irekiera honek gertutasuna eskainiko die pertsona askori, eta Eusko Jaurlaritzak sektorearen urbanizazioa bermatzeko duen elkarlanerako jarrerarekin, Sopelatik Urdulizko Ospitalera oinezkoak igarotzea errazteko pausoak emango dira, eta hori guztiz beharrezkoa da. Aldarrikapen garrantzitsua da hori, Sopelako bizilagunek behin eta berriz adierazi dutena”.
Instalakuntzaren ezaugarriak
Estazio horrek ikuskapenetarako teknologiarik berriena eta digitalizazio-mailarik handiena ditu, eta, hala, bizkortasun eta segurtasun handiagoa lortuko du ikuskapen-prozesuetan. Instalazioek hiru ikuskapen-lerro izango dituzte, bi ibilgailu arinenak eta unibertsal bat, eta motozikletak ikuskatzeko box egokitu bat. IATren geltoki berriak astelehenetik barikura, 07:30etik 15:00etara, emango du zerbitzua. Hitzordua aurrez eskatu gura izanez gero, jo webgunera edo deitu 946 149 021 telefonora. Zerbitzuaren beharren arabera, ordutegi hori luzatu ahal izango da.
