Aloka Surfen sorreratik surf egokituko klaseak ematen dituzue.
IBON ASTOBIZA: Bai. Gure ustez, edozein pertsonak, edozein dela ere bere ezaugarri fisikoa edo psikologikoa, kirol honetaz gozatu dezake. Hasieran, aniztasun funtzionala zuen jende ezagunagaz ibiltzen hasi ginen. Gero, pandemia baino lehen, APNABI edo kirol egokituaren Bizkaiko Federazioaren eskutik lanean hasi ginen. Hortik bidaltzen zizkiguten desgaitasun sentsorialak eta fisikoak zituzten lagunak. Modu autodidaktikoan eta praktikagaz ikasi dugu familiengandik eta pertsonengandik. Etortzen ziren pertsonen profila ezagutzen saiatu ginen, eta haien beharretara egokitzen.
Zenbat erabiltzaile dituzue surf egokituan?
ARRATE MIJANGOS: Ez dago erabiltzaile kopuru zehatzik. Astero, 10-12 lagun izan ditugu APNABItik, esaterako. Ikusmen edo mugikortasun murriztua duten lagunak, bizkarreko lesioak dituztenak... Pertsonaren arabera, modu batera edo bestera egokitzen joaten gara.
I. A.:Hasieran, kasu larrietan, segurtasun-baliabide guztiak jartzen ditugu eta lauzpabost monitore gaude pertsona bategaz. Apurka-apurka pertsona ezagutzen joaten zarenean, monitoreren bat alde batera uzten duzu. Azkenean, saioen bidez, lotura bat sortzen da. Familiek asko laguntzen dute ere.
"Surfean, itsasoaren kontra jotzen duzu, ez dago besterik. Oso gogobetegarria da edonorentzat; beraz, nire ustez, osasun mentalari dagokionez, edonori asko gustatuko zaio"
Duela gutxi sari bat irabazi duzue, ezta?
I. A.: Iberdrola Supera saria irabazi dugu. Emakumeen kirolaren aldeko saria da, gizarteratzearen kategorian. Hala, sari ekonomikoaren laguntzagaz aniztasun funtzional fisiko eta psikologiko ezberdinak dituzten lagunentzako materiala erosiko dugu, modu horretan, surfa modu egokituan erosoago egin ahal izateko. Gainera, dirua sobratuz gero, aldagela duin batzuk ere egin gura ditugu.
Zer ekarpen egiten dizue aniztasun funtzionala duten lagunei klaseak ematea?
A. M.: Niri poza ematen dit. Izan ere, aniztasun funtzionala duten lagunek, askotan, beste batzuek baino askoz ere jarrera hobea dute. Azkenean, komunikazio mota bat ziurtzat jotzen dugu, eta ez, pertsonen arteko komunikazio mota asko daude. Errealitateak ikusten ikasten duzu, eta oraindik hobetzeko dauden gauzez kontzienteago bihurtzen zara.
I. A.: Maila pertsonalean oso polita da, familiek transmititzen dizutelako eta itzultzen direla ikusten duzulako. Egia da negozio mailan nahiko bideraezina dela. Pertsona guztiei irekita gaude, baina pertsona batek saio bat egiteko lau monitore behar dituenean, galdetzen diozu zeure buruari zenbat kostatzen duen saio horrek. Guk beti utzi dugu prezio estandarrean, batzuetan are gutxiago, familien egoera ekonomikoa ezagutzen dugulako. Horregatik, beti aldarrikatu dugu erakunde edo fundazioei laguntza eskatzea. Lauzpabost begirale behar dituen familiari 150 euro kobratzen badizkiogu, kirol inklusiboa baino, esklusiboa bihurtzen da.
