Uztailaren 17a, eguena, udako egutegian gorde beharreko data berezia da. Izan ere, urtero bezala, Sopelak nazioarteko dantza-taldeei egundoko harrera egingo die Folklore Bizian 2025 jaialdiaren barnean. Hala, aurten, Mexikoko Fiestas de Mexico talde folklorikoa, Tajikistaneko Gaffar Valamzade talde folkloriko nazionala eta Euskal Herriko Galdakaoko Andra Mari Dantza Taldea izango dira protagonista nagusiak.
Aurtengoa 38. Folklore Bizian jaialdia izango da, eta urtez urte, hurbilduko diren lagun guztiak txundituta uzteko erronka dute dantzariek. Urtero legez, arrastiko 20:00etan hasiko da, Sopelako Urgitxieta plazan.
Alde batetik, Fiestas de Mexico taldeak bere mariatxi tekatitklense berezia ekarriko du, Mexikoko folklorerik onenak Sopela zipriztindu dezan. Bestalde, Tajikistaneko Gaffar Valamzadek Asiako doinu ederrak ekarriko ditu. Tayikoek sortu zuten, farsia darabilten lagunek, euren kultura mundutik zabaltzeko asmoz. Azkenik, Andra Mari Dantza Taldea dago. Euskal dantzak lantzen dituen Galdakaoko taldea da, 1955ean sortu zena. Hala, beste behin, herritarrak dantzan jarriko dituzte munduko soinu ezberdinakaz!
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
