Eusko Jaurlaritzako Etxebizitza eta Hiri Agendako sailburuaren aginduak abian jarri du Sopelako Loiola auzoko 24 babes ofizialeko etxebizitzen esleipen prozedura. Etxebizitza horiek errentamendu-erregimenean esleituko dituzte eta eskabideak Etxebideren bidez aurkeztu ahal izango dira irailaren 15etik urriaren 3ra arte.
Etxebizitzetatik bat mugikortasun urri iraunkorra dutenentzat egokituta egongo da, eta gainerakoak logela kopuruaren arabera banatuta daude: 5 logela bakarrekoak, 12 bi logelakoak eta 6 hiru logelakoak.
Prozesuan parte hartu ahal izateko, besteak beste, Sopelan erroldatuta egotea, etxebizitzarik ez edukitzea eta 9.000 eta 45.022,57 euro arteko diru-sarrerak izatea eskatzen da. Salbuespenak aplikatuko dira dibertsitate funtzionala duten pertsonentzat, genero-indarkeriaren biktimentzat eta etxebizitza eskubide subjektiboa aitortuta dutenentzat.
Etxebizitzen banaketa kupo sistemaren arabera egingo da, eta eskaintzen diren kupoen artean hauek daude: gazteak, premia berezia dutenak eta kupo orokorra, besteak beste. Esleipenaren ondoren, itxaron-zerrendak osatuko dira, eta zerrendak Etxebideren bulegoetan eta webgunean argitaratuko dira.
