Plataformak azaldu du testuingurua bereziki gatazkatsua izan zela 2021 urtearen hasieran Sopelan: "Eraikitze lanetan zegoen supermerkatu baten aurkako plataforma herritarra zein joko-aretoen aurkako dinamika martxan zeuden. Eta gainera, Sopelako zenbait udaltzain eta hainbat gazteren arteko gatazka nabarmena zegoen".
"Testuinguru horretan, herri-mugimenduan aktiboki lanean ari ziren lau herritar izutu asmoz, operazio hau jarri zuten martxan. Hori inongo frogarik gabe eta modu desegokian egin zuten. Horrela, orain lau sopeloztarren bizitzak errotik baldintzatuko dituen egoera baten aurrean gaude", adierazi dute, zehaztuz herritar horiei 32 urteko espetxe-zigorra eta 112.400 euroko isuna ezarri gura dizkietela.
Egoera "larri" horren aurrean, Sopelako 4ekin1 plataformak manifestazioa deitu du zapaturako, urtarrilaren 31rako, eguerdiko 12:30ean, Sopelan, herritar horiek bizi duten egoera salatu eta babes publikoa emateko.
Azkenik, plataformak azpimarratu du antolakuntza kolektiboa eta elkartasuna funtsezkoak direla halako egoeren aurrean, eta herritarren ekarpen eta proposamenak jasotzeko prest agertu da.
