Sopelako Auzo Elkarteak 2023aren amaieran jarri zuen administrazioarekiko auzi-errekurtsoa Abaroko Plan Partzialaren aurka. 2025eko irailean, aldiz, EAEko Justizia Auzitegi Nagusiak Udalari arrazoia eman zion eta Planaren legezkotasuna berretsi zuen. Epai horren aurka aurkeztu zuen SAEk kasazio-errekurtsoa abenduaren hasieran; izapidetze konplexua duen helegite horrek, udalaren esanetan, sektorearen garapen urbanistikoa geldiarazten du.
Abenduko osoko bilkuran, udal-talde guztiek —SAEko presidente eta zinegotzi bakarra izan ezik— ez zutela errekurtsoa ulertzen ezta onartzen ere adierazi zuten, eta EH Bilduk, EAJk, PSE-EEk eta Elkarrekin Sopelak, 17 zinegotzitik 16k, Abaroko sektorearen garapena bultzatzeko elkarlanean jarraitzeko borondatea berretsi zuten.
Unai del Burgo jarduneko alkatearen hitzetan, "zer irabazi nahi da errekurtso horrekin? Gure ustez, ezer positiborik ez Sopelarentzat. SAEk sektore honen garapena geldiarazi nahi du arrazoi partikularrengatik, eta horrek kalte larria eragiten die herritarrei, babes ofizialeko etxebizitzen eraikuntza atzeratzen duelako". Alkateak azpimarratu du etxebizitza horiek “premiazkoak” direla gaur egun Sopelan, eta horregatik, Abaroko Plan Partzialaren aurkako kasazio-errekurtsoa “onartezina eta akats historikoa” dela nabarmendu du.
