Azoka solidarioaren ekimena Urdulizko emakume-talde batek bultzatu zuen, Siriako errefuxiatuek bizi duten egoera gogorraren aurrean zerbait egin behar zutela uste baitzuten. Horrenbestez, ideia aurkeztu eta Udalak Iparralde kiroldegia utzi zien dohainik, han egiteko azoka. Horretarako, oso prezio merkean saldu ziren herritarrek emandako produktuak, berbarako: liburuak, jostailuak, altzariak, etxeko tresneria, makineria, arropa eta apaingarriak. Saldu barik geratutako produktu guztiak Caritas erakundeari eman dizkiete, beharrizana duten lagunei eman diezaien.
Bestelako jarduerak
Salmentez gainera, egun horietan, azokan bestelako jarduerak ere egon ziren. Besteak beste, trikiti musikaren emanaldiak eta umorezko irakurketa dramatizatuak, Getxoko Itxartu elkartearen antzerki-taldeak antolatuta.
