Javier Bilbao Lopategi aurkeztuko du, berriz ere, EAJk Urdulizko alkatetzarako. Egungo alkateak adierazi duenez, epe ertain eta luzera begira egiten du lan, eta ez bakarrik epe laburretara begira. Hurrengo legealdiari dagokionez, egun "nahiko aurreratuta" dituzten hainbat ekimen antolatzen jarraitu gura duela azaldu du.
Izan ere, Urduliz herriak "eraldaketa prozesu handia" bizi duela esan du Bilbaok. Azken agintaldiko proiekturik "deigarrienak", trenbideak lurperatzea eta ospitalea irekitzea izan direla ere azaldu du. Nolanahi ere, aipagarriak iruditu zaizkio Elorza eskola zabaltzeko lanak, Antsonekoa enparantza estaltzea, Iparralde-kiroldegi ondoan udal-etxebizitza tasatuak eraiki izana eta Udalak urtero egin ohi dituen Enplegu-Planak.