Urdulizen indarkeria matxistaren aurkako prebentziorako eta sentsibilizaziorako Berdintasunaren bidean kanpainari jarraituz, ikasturte honetan urduliztarren artean eztabaidatzeko eta hausnarketa pizteko hiru mahai-inguru antolatuko dituzte. Lehena bihar egingo dute, hilaren 17an, 17:30etik 19:00etara Inola elkartearen egoitzan (Torrebarri bidea 1, Antigua kultur etxea).
Bertaratzen direnek eztabaidatuko dute zer ulertzen duten indarkeria matxistatzat, zer nolako indarkeriak sartzen diren aterki horren barruan eta horiei aurre egiteko estrategiak zeintzuk izan daitezkeen. Leyre Apellaniz berdintasun aholkularia eta ekimenaren antolatzaileetako batek azaldu duenez, "ez da zertan kontzientzia feminista izan behar bertaratzeko, arazo horri aurre egiteko parte hartzea gura izatea baizik". Biharko saioan haurtzaindegi-zerbitzua ere eskainiko dutela eta topaketa online ere jarraitu ahal izango dela iragarri dute. Parte hartzeko esteka honetako formularioa bete beharko da, saioa zuzenean ala online jarraituko den adieraziz.
Ildo berean, zapatuan, hilaren 19an, Emakumeen Topaketen XIII. edizioa egingo dute Urdulizen. Kasu horretan, antolatzaileak Uribe Kostako Mankomunitatea eta Andrabarriak Elkartea izango dira, eta Amelia Tiganus ekintzaile feminista eta idazle ezagunaren parte-hartzea izango dute.
Bosgarren baldosa
Horretaz gain, alde batetik, Berdintasunerako bidearen bosgarren baldosa jarriko dute aurten. Horretan joango den lelorako proposamenak batuko dituzte hilaren 25ean, Emakumearen Aurkako Indarkeria Ezabatzeko Nazioarteko Egunean, udaletxean jarriko duten panel batean. Beste aldetik, urtarrilean eta otsailean urduliztarren arteko beste bi mahai-inguru prestatuko dituztela iragarri dute, eta, martxoaren 8an, gazteen artean inpaktu gehiago lortzeko helburuagaz, indarkeria matxistaren aurkako scape room bat egiteko asmoa ere azaldu dute.