Eneko Bilbao gailendu zaio Beñat Amaderi Urdulizen

Gertuko lagunen babesa jaso zuen Beñat Amadek zapatuko lehian. © BEÑAT AMADE

Apustua beregana zezakeela uste zuen arren, ezinezkoa izan zitzaion Beñat Amade getxoztarrari Eneko Bilbaori aurre egitea joan den zapatuan Urdulizko probalekuan jokatutako desafioan. Amadek aitortu duenez, giza-proba "gogorra" egin zitzaion, eta Bilbaok bere trebeziari eta pisu-aldeari probetxua aterata, bi minutu pasatxoko aldea atera zion probaldia amaitzerakoan.

Zapatuan, hilaren 21ean, 2.000 euro jokoan zegoen desafioari aurre egin zioten Beñat Amadek eta Eneko Bilbaok Urdulizen. Hotza nagusi zen arren, herri kirolen jaialdira gerturatu zuren 200 lagunek giroa epeldu zuten, arrastiko 18:00etatik aurrera. "Giroa oso polita izan zen; hurbildu zen jendeak bere berotasuna agertu zigun", gogoratzen du Amadek.

Desafioa 100 kilogramoko harriaren jasoaldiakaz abiatu zuten. Horretan, Bilbao irten zen nagusi, 30 jasoaldiak getxoztarrak baino minutu erdi lehenago bukatuta. Giza-proban, 400 kilogramoko harriari sei untza –edo buelta– egin behar izan zituzten biek; Bilbao horretan trebea da –Euskal Herriko txapelduna da–, eta hori erakutsi guran, Amadek baino lau minutu gutxiago behar izan zituen saio horri aurre egiteko. "Oso gogorra izan zen; bere pisuari etekina atera zion (Bilbaok), eta kolpe bakoitzeko ni baino apur bat gehiago mugitzeko gai zen. Pixkanaka-pixkanaka, abantaila hori handituz joan zen, nik uste nuena baino gehiago", azaldu du Amadek.

Lau minutuko aldeak banatu arren, getxoztarrak aurkariari bi minutu gerturatzea lortu zuen azkenengo lehian. Korrikan, probalekuari 47 bueltan eman behar izan zizkioten kirolari biek, lau kilometroko distantzia eginez.

Denborak:

  Harri-jasotzea Giza-proba Korrika Guztira
Beñat Amade 6' 09'' 35' 45'' 54' 35'' 54' 35''
Eneko Bilbao 5' 23'' 31' 57'' 52' 16'' 52' 16''

Desafioaren uneetako bat. © BEÑAT AMADE

Erlazionatuak

Nork irabaziko ote Amaderen eta Bilbaoren arteko apustua?

Urduliz

Beñat Amade getxoztarrak eta Eneko Bilbaok herri kiroletako apustu bat itxi zuten joan den urriaren 9an, Cannon jatetxean. Adostutakoaren ar...
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun