"Hori da herri honen industriaren etorkizuna bermatzeko administrazio publikoak darabilen estrategia atzerakoia? Enpresak itxi, langileak kaleratu eta kapitalak joka dezala nahi bezala?", seinalatu dute langileek. Hala, defendatu dute Mecanerren instalazioen jabetza eta etorkizuneko proiektu industriala eskualdearen eta lurraldearen behar sozialei eta eraldaketei lotu behar zaizkiela.
Alternatiba ekosozial baten alde borrokatzen jarraituko dute: "Planetaren mugen barruan eta sozialki justuak izango diren produkzio mota eta enpleguak beharrezkoak izango dira eta horiek lortzeko egin behar dugu trantsizioa". Hala, hiru gauza eskatu dituzte lantokiaren aurrean:
- Industria sail eta gainontzeko administrazio eskudunei makinariaren salmenta geldiaraztea eta instalazioen aldi baterako erosketa publikoa bideratzea.
- Mecanerren instalazioak industria ekoizpen mota jasangarrirako izatea. Industriaren nahitaezko eraldaketa ekosozialean erreferente izan gura dute.
- Zer, nola eta nortzuk produzituko duten erabakitzeko eta proposatzeko aukera ematea langileei, sindikatuei, erakundeei, akademiari eta gizarte mugimenduei prozesu parte hartzaile bat bideratuta.
