2024ko martxoaren 4an gaixotu zen Martina: bat-batekoa izan zen, ez zuen aurretiaz inongo zantzurik izan eta hainbat frogaren ostean FIRES gaixotasuna zuela esan zioten. ZIUn ospitaleratuta egon zen bi hilabetez, eta komara bultzatu behar izan zuten krisi epileptikoak gelditzeko beste modurik ez zegoelako. Ekainean ospitaletik atera ziren.
"Egun, aulkian joan behar du eta ez du hitz egiten. Gure bizitza guztiz aldatu da", azaldu du amak. Etxera bueltatu direnetik, Martinaren mugikortasuna hobetu dela nabaritu dute. Alabaina, alderdirik txarrena kognitiboa da: ezin dira beragaz hitzaren bitartez komunikatu eta izaera osoa aldatu zaio. "Ez du ulertzen zer gertatzen zaion eta egoera oso zaila da. Urduri jartzen da eta jo eta koska egiten du". Gainera, orain, medikuek itsutasun kortikala ere duela uste dute, ez duelako begirada finkorik mantentzen. Alegia, uste dute nahiz eta begiek ikusi bere garunak ez duela informazio hori prozesatzen.
Orain, kasu horietan espezializatutako Madrilgo neurologo bat bisitatzen dute. Hala, klinika pribatu batean 40.000 euroko oinarrizko azterketa bat egingo dute lehen aldiz FIRESa aztertzeko. Horregatik, dirua biltzeko txosna bat jarri zuten Urdulizko jaietako lehenengo aste-akabuan. FIRESa ikertzeko lehenengo azterketa horretarako gastuak kubritzeaz gain, Madrilera egin behar dituzten bidaietarako ere dirua behar dute. Izan ere, bi gurasoak gaur egun lanaldi-erdian daude bere alaba zaindu ahal izateko.
Elkartasuna eta laguntza
Momentu zail hauetan, Ondarrak bere amaren laguntza bereziki eskertzen du: "Egunero dator Martinagaz egotera. Bere laguntzarik gabe gu ezingo ginateke lanera joan". Horrez gain, herritar guztien elkartasuna sentitu dute. "Herrian mundu guztiak babestu gaitu, ez soilik urduliztarrek, baita Plentziako eta Algortako lagun eta ezagunek ere", eskertu du amak. Izan ere, bizilagunek tortillak eta pintxoak eraman zizkieten txosnan saltzeko eta diru gehiago biltzeko.
Gainera, Espainiako Estatuko FIRES elkartearen parte dira Martinaren gurasoak eta euren esanetan "oso lagungarria" da beste familiakaz hitz egitea gaixotasunaren inguruan gehiago jakiteko. "Guk dakigula, EAE mailan, FIRESa duen beste ume bat soilik dago; Espainiako Estatuan 20 bat kasu inguru. Gomendatu digute batez ere indartsu mantentzeko eta pazientzia izateko, lehenengo urte eta erdia garairik zailena delako. Oraindino egoerara egokitzen ari gara".
Hala, irailaren 21ean, zapatuan, koadro eta eskulturen erakusketa eta salmenta egingo dute Martinarentzako dirua biltzeko Urdulizko Udaletxe plazan, Udalak antolatuta. Dohaintzan emandako koadroak Jon Olabarriarenak dira eta 10:00etatik 14:00etara izango da erakusketa.
Dohaintzak onartzen dituzte kontu korronte honetara bidalita:
MARTINA ES96 2095 0370 90 9119402440
