Imanol Gallego eta Alain Arroyo getxoztarrak eta Jonas Ramalho barakaldarra dira + Que Futbol Academy proiektuaren bultzatzaileak zein entrenatzaileak, eta Helsinki Cup jokatzera joateko bidaia antolatu dutenak. Azpimarratu dutenez, "esperientzia izugarria izan da, irabaztea lortu dugulako, baina baita umeek bidaiatzeko izan duten aukeragatik ere: turismoa egin dugu, futbolera beste herrialde batzuetako taldeen aurka jokatu dugu eta ume askok gurasoak gabe lehen aldiz bidaiatzeko aukera izan dute, hori guztia oso aberasgarria da".
Gainera, horren aurretik, ekainaren 21ean, Urdulizen Uribe Kosta Cup ere antolatu zuten lehengoz, eta inguruko sei talderen parte-hartzea izan zuten. Hurrengo urtean txapelketa hori handiagoa izateko prestatzen ari direla aurreratu dute.
Aurreko denboraldian ekin zioten euren proiektuari eta eskolan 6 eta 14 urte arteko umeak hartzen dituzte. "60 neska-mutil ditugu, eta hurrengo urtera begira gure asmoa hazten jarraitzea da, batez ere, neska gehiago erakartzea”, adierazi du Gallegok. Eskolako jokalariak inguruko hainbat taldetakoak dira: Astrabudua, Arenas... eta Urdulizko taldean entrenatu arren, azpimarratu dute ez daukatela lotura zuzenik talde horiekakaz. Arroyok azaldu duen moduan, beraien akademian aukera ematen dute umeakaz indibidualki eta modu zehatzean, teknikoki eta fisikoki entrenatzeko, talde handiagoetan bete ezin dituzten alderdiak osatzeko.
Bidaiatzeko aukera gehiago
"Egia esan, Helsinkin lortu duguna izugarria da, bai emaitzen aldetik, guk ez dugulako talde bat entrenatzen, guk jokalariak indibidualki prestatzen ditugulako, eta gure lehen urtean hara joateko aukera izan dugulako ere. Joan aurretik, entrenamendu batzuk egin genituen, baina ez da guk bilatzen genuena; beraz, esan bezala, emaitza itzela izan da: batean garaipena eta bestean final-laurdenetara heltzea", goraipatu du Gallegok.
Entrenatzaileek aurreratu dutenez, lehen aukera horrek ateak ireki dizkie aurrerago ere beste txapelketa batzuetara joan ahal izateko, eta Brasileko edo Europako beste lehiaketa batzuetara joateko proposamenak ere jaso dituzte. "Oraindik zuhurrak izan gura dugu, gutxika-gutxika joango gara, familientzat gastu handia baita; hala ere, seguru laster esperientzia errepikatuko dugula”, iragarri du entrenatzaile getxoztarrak.