Hilabeteko lehen eguenetan antolatzen den ekimen ibiltari honek Urdulizko taberna desberdinak hartzen ditu agertoki, eta oraingo honetan Txiberri izango da anfitrioia. Antolatzaileek azaldu dutenez, saioak irekia eta parte-hartzailea izan gura du; hau da, edonork abestu dezake, giro informalean eta presiorik gabe.
Gainera, antolakuntzak parte hartzea errazteko tresnak jarri ditu martxan. Interesdunek kantutegira sarbidea dute QR kode bidez, eta Whatsappen bitartez abesti berrien proposamenak bidaltzeko aukera ere badago. Horrela, saio bakoitza dinamikoa eta askotarikoa izatea bilatzen da, parte-hartzaileen ekarpenakaz osatuta.
Ekimenaren atzean Orbizta Euskera Elkartea dago, eta helburu bikoitza azpimarratu dute: euskararen erabilera sustatzea eta herritarren arteko harremanak indartzea aisialdiaren bidez. Topakantak, beraz, kantua aitzakia hartuta, komunitatea ehuntzeko gune izan gura du.
