Jardunaldian zehar, argazki-erakusketek eta Anxo Caoren Vida marina Atlantica hitzaldiak auditoriuma bete zuten; errealitate birtualeko esperientziek, berriz, ehun lagun "urperatzea" lortu zuten Maremasmaren urpeko irudien bidez. Umeentzako tailerrek Bizkaiko Golkoko itsas bizitza eta uraren garrantzia landu zituzten, eta arrakasta handia bereganatu zuen Plentziako Itsas Estazioko (PiE-EHU) ikertzaileek gidatutako hondartzako mundu mikroskopikoaren erakustaldiak, une batzuetan ilarak sortzeraino.
Jaialdia antolatzen duen Tantak Elkarteko antolatzaileek azpimarratu dute jaialdia posible izan dela Maremasma, Bigune, Itsas Garapena eta Rural Kutxa entitateen babes ekonomikoari esker, eta horrek programazioa doakoa eta publiko guztientzat irekia izatea ahalbidetu duela. Tantak Festek programazioagaz jarraituko du maiatzaren 27tik 31ra, Mater Ontzi Museoagaz eta Itsasmuseum Bilbaoagaz antolatutako tailer konbinatu baten bidez; eta datorren azaroaren 22an itzuliko dela ere iragarri dute, ozeanoari eta itsas iraunkortasunari lotutako jarduera gehiagogaz.
