Urduliztarrak kontatu duenez, ardi-larrua mozteko zaletasuna pandemia garaian etorri zitzaion: "Irakurri nuen hemen ardi-moztaile gutxi zeudela, Uruguaitik eta etortzen zirela, eta gutxika-gutxika lagun batek mundu honetan murgildu ninduen; kuriositatea eta txikitatik nuen frustrazioren bat edo izango zen, kar-kar". Lanbidez irakaslea bada ere, Euskal Ardi Moztaileen Elkarteko kidea da, eta kirol bilakatu den ogibide honen berri emateko erakustaldietan ere parte hartzen du. Azaldu duenez, ardi-moztaileen arteko txapelketak beti egon diren arren, "orain, indar berezia hartu du kirolaren ikuspegiak, eta, duela gutxi, euskal moztaile batzuk Zeelanda Berrian ere egon ziren lehiaketa batean".
Lehiaketetan abiadura eta mozketaren kalitatea neurtzen direla kontatu du: "Azkarren ibiltzea garrantzitsua da, baina baita ardiaren azala zaintzea eta artilea ondo kentzea ere". Era berean, arrazaren arabera mozketa asko aldatzen dela ere gaineratu du, "batzuk lasaiagoak dira, beste batzuk biziagoak eta asko mugitzen dira...". Hala ere, azpimarratu du ardiek ez dutela sufritzen eta beraien biziraupenerako ezinbestekoa dela artilea moztea, ez zaielako berez erortzen eta luze uzteak osasun arazo larriak eragin diezazkioke.
Elkartearen lanari dagokionez, besteak beste, belaunaldi berriak erakartzea da beraien helburuetako bat. Horretarako, txapelketak, erakustaldiak eta hasiberrientzako ikastaroak ere egiten dituzte Arantzazun. "Bada oso indartsu datorren gazteren bat, Mikel Galbezek adibidez hiru hilabete eman ditu Zeelanda Berrian formatzen". Horrez gain, iazko irailean, Euskal Herriko eta Nazioarteko Ardi Moztaileen Txapelketaren lehen edizioa ere antolatu zuten, 24 euskal moztaile eta 42 nazioarteko moztaileren parte hartzeagaz.