Gaur hasi eta urriaren 29ra artean, eguen eta bariku denetan, Bilbo Hiria pop-rock lehiaketaren emanaldiak hartuko ditu Bilborock aretoak, 20:00etatik aurrera. Hain zuzen ere, musikari getxoztarrak dauzkan Nazka taldeak bihar, hilak 18, joko du, Bloom (Frantzia) eta Mechanik bandakaz batera, pop-rock atalean. Aurtengo edizioan 643 taldek eman dute izena. Hortik, 38 aukeratu dituzte kanporaketetarako. Horien artean Uribe Kostakoak diren edo eskualdeko kideren bat daukaten lau talde daude.
Nazka (Getxo eta Bilbo) alde batera utzita, Adam Giles Levy getxoztarrak urriaren 15ean igoko dira Bilborockeko agertokira, Pelax eta Cowboy's Orchesta (Gipuzkoa) eta Rosy Finch-egaz (Alacant) batera. The Flying Scarecrow sopeloztarrak, Metal atalean joko duten uribekostar bakarrak, ostera, urriaren 16an joko dute, Niketz taldeagaz. Azkenik, Sopela eta Bilboko taldekideak dauzkan Dingos & Flamingos taldeak urriaren 29an edukiko du kanporaketa, La Red Bullet (Nafarroa) eta The Fire Tornados (Zaragoza) taldeakaz batera. Bestalde, 2013an metal kategoriako irabazlea izan zen eta jatorri sopeloztarra daukan Rise to Fall taldea gonbidatu dute urriaren 25ean jotzera.
Musikaren munduko profesional eta adituz osotutako epaimahaiak aukeratuko ditu talder onenak. Final nagusiak azaroan izango dira, Bilborocken bertan: 12an, elektronika eta beste joera batzuetako finala, 13an metalekoa eta, 14an, pop-rock arlokoa.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.