Inauteri giroan, egun osoko jaia antolatu zuten zapatuan Larrabetzuko Itallen eta Mungiako Taket bertso-eskolek, Mungian. Eskualdeko bertso-giroa sustatzeko Zortzi Puntutan ekimena lagunartean burutu zuten: goizean, 11:30ean hasita, 3 kanporaketa jokatu zituzten herriko 3 tabernatan. Ondoren, bazkaria eta bazkalostean finala izan zituzten. Bazkaltzeko 50 bat lagun batu ziren, eta osteko saioa entzuteko 60 bertsozale inguru.
Honakoak izan ziren parte hartu zuten bertsolariak: Aitor Esteban Etxebarria itzubaltzetarra, Jon Etxebarria "Txontxe" algortarra, Ibon Larrazabal, Jon Larrabide, Sergio Peña, Asier Legarreta, Peru Berazategi, Ortzi Garitano, Jone Larrinaga, Malen Amenabar, Miren Ibarluzea eta Etxahun Lekue.
Buruz burukora Miren Ibarluzea mungiarra eta Etxahun Lekue larrabetzuarra iritsi ziren. Azkenean, txapelduna Etxahun Lekue suertatu zen. Etxahuni txapela Jose Mari Bilbaok jantzi zion. Goierriko bertsolariak 1972an izan zuen bere lehenengo plaza, Erandion, Jose Unbe eta Kastrejana lagun. Hurrengo hamarkadetan plazatan ibili zen. Txapelketetan ere jardun zuen: 1984an, Taket Sarian; 1985ean, Bizkaia eta Arabako txapelketan; eta 1986an, Euskal Herrikoan. Egun, Taket bertso-eskolako kide da.
Uribe Butroeko txapelketaren ostean, Zortzi Puntutan ekimena aurrera doa, eta martxoaren 5ean helduko da Uribe Kostara.
Talde-argazkia
