Hurrengo saioa eguenean izango da, hilak 11, Itzubaltzeta/Romon. Branka kultur elkartean ere Algortan proiektatutako dokumentala aurkeztuko dute; ondoren, Oskar Sanchez abokatuagaz batera, Mitxel Sarasketa preso ohiak hitzaldia emango du.
Egun berean, Leioa Libre ekimenak "Atera gabeko arantzak. Garbitu gabeko zauriak" dokumentala aurkeztuko du, 19:30ean, Kultur Leioako entzungelan. Daborduko gonbidapenak jaso daitezke Kultur Leioan bertan, Udondo tabernan, San Bartolome auzoko kultur etxeko tabernan, Menoyon, Txopera Berrin, Reinetan, La Kazun, Ganekon eta Kurkudin. Torturak pertsonarengan daukan eragina dauka oinarritzat ikus-entzunezkoak: Olatz Barrenetxea Larrondo psikologo sopeloztarrak horretaz berba egiten du bertan eta Erika Bilbao bera elkarrizketatzen du horren inguruan. Leioaztarraren psikologoa da Barrenetxea. Berbaldia ere eskainiko dute biek.
Barikuan, hilak 12, berriz, Erika Bilbaok maiatzean izango duen epaiketa salatzeko eskualdeko manifestazioa egingo dute Leioan, 20:00etan, Boulevardetik abiatuta, "Torturarik ez! Erika libre" lemapean.
Azkenik, zapatuan, hilaren 13an, Algortatik Hanka indar okupatzaileen kontrako mugimenduak mobilizazioa deitu du. Lehenengo hitzordua 17:00etan izango da Txiki-Otaegi plazan (San Nikolas plaza); ondoren, 17:30ean Guardia Zibilaren kuartelera abiatuko dira, "torturatzaileak Euskal Herritik kanpora" joan daitezela aldarrikatzeko asmoz.
