Uribe Ospitalea Plataformak egindako eskaerari erantzunez, gaurko osoko bilkuran mozio bateratua aurkeztuko dute Sopelako EH Bilduk, Denok Baterak (DB) eta Sopela Orainek. Hain zuzen ere, aipatutako plataformak jasotzen dituen eskarietako bati buruz erantzun dio gaur bertan Udal Gobernuak: Urdulizko ospitalera joateko zerbitzuen maiztasuna areagotzeko eta ordutegiak zabaltzeko eskaera egin die Metro Bilbao garraio-enpresari eta Bizkaiko Foru Aldundiari (Bizkaibus). Ibilgailuentzat, "herriko bizimodua baldintzatuko ez dituzten sarbideak" jartzeari buruz, ostera, ez dute ezertxo ere aipatu EAJko agintariek. Uribe Ospitalea Plataformaren arabera, erietxea zabaltzen dutenean, egunero hiru mila auto gehiago igaroko dira Sopelatik. Herritarrak udal batzarrera joatera deitu ditu eragile horrek; 19:30ean izango da.
Gaur helarazitako prentsa-oharrean aipatzen denez, Sopelako Udalak Urdulizko ospitaleko "sarbideen irisgarritasuna bermatu" gura du; eta, modu berean, "sopeloztarrakaz hartutako konpromisoari" erantzun, garraio publikoa berrindartuz eta horren zerbitzu zein sopeloztar denen bizi kalitatea hobetuz. "Sopelako Udalak, orain arte egin duen moduan, Sopelako auzotar denen interesak babesteko eta sustatzeko lan eta erantzukizunari irmo eutsiko dio", jeltzaleek diotenez.
Uribe Ospitalea Plataformaren ustez, ostera, bestelako neurriak ere hartu beharko lirateke: besteak beste, aurreko Udal Gobernuak prestatutako txosten teknikoan oinarriturik, sarbide posibleen gaineko prozesu parte-hartzailea; herriari galdetzeko konpromisoa; eta erakundeen arteko lankidetza arazoari konponbidea ahalik eta lasterren emateko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
