ELA eta LAB sindikatuen oharra:
ELA eta LAB, sindikatuko ordezkariok, ondorengo enpresetan ordezkatuak gaudenak: CAF Transport Engineering, Mecaner, Residencia Barrika Barri, Gorlizko udaletxea, Sopelako udaletxea eta beste hainbat; bat egiten dugu Gure Esku Dago herri-ekimenak Uribe Kostako 2017ko maiatzaren 7rako deituak dituen herri-galdeketekin; komunikatu honen bitartez, datorren maiatzaren 7rako deituak dauden herri-galdeketei gure babesa eman nahi diegu.
Babesa adierazi nahi diegu herri-galdeketei elkarrizketan jardutea, eztabaidatzea, aurrez aurre jartzea, hausnartzea... eta azkenean jendeari galdetzea, normalena delako. Galdetzea da ditugun aferei buruz erabakitzeko modurik onena, arazoak konpontzeko, beren elkarbizitza antolatzeko nahiz aurrera begirako erronkei heltzeko.
Batzuek diote galdetzeak eta erabakitzeak banandu eta zatitu egiten gaituztela, edo arduragabekeria dela. Baina gure iritziz, galdetuak izatea eta kolektibo gisa erabakitzea, kohesiorako eta erantzukizunez jokatzeko ariketa ezin hobea da. Gure bizitzak gure esku hartzen baititugu, beste inori delegatu gabe eta arduraz.
Langileak parte hartzera animatzen ditugu beste kolektibo eta beste pertsona askok bezala, egunero gure baitan jasaten baitugu zer den menpekoa izatea. Soldatapeko lanaren munduan, gure munduan, gutxi batzuek erabakitzen dute zer, nola, non eta zein modutan ekoizten den... Langileok bizirauteko eskaintzen zaigun lana onartu beste aukerarik ez dugu. Eta menpekotasun hori ez da soilik lan-arloan gertatzen. Kulturan, sexuen artean, nazioen eta etnien artean, guztion artean gertatzen da.
Testuinguru horretan, kontsulta egitea eta erabakia hartzea ardura (ahalduntze) ariketa bat da, gu kolektibo gisa indartzeko eta irmotzeko modu bat, menpekotasunaren kate guztiak hautsi nahi ditugula esateko modu bat, gure erabakien jabe izan nahi dugula gure bizitzako arlo guztietan: familian, lanean, herrietan, auzoetan nahiz estatuetan. Horrela erabakitzeko eskubidea erabat uztartzen bai da gure egunerokoan, langileon lanpostuen defentsan eta bermean.
Hau horrela, herritarrei, oro har, eta bereziki langileei, dei egiten diegu, herri-galdeketa hauetan parte har dezaten maiatzaren 7an.
