Oraingoz, Ahal Duguk jakinarazi ditu aukeratutako hautagaiak eta lortu dituzten babesen ehunekoak, baina boto-kopuruak zehaztu barik.
Erandion, Pablo Larrauri Muñoz dendaria nagusitu zaio Silvia Gomez Casquet irakasleari, izena emanda dutenen %56,25eko babesagaz. 2014an ez zuten idazkari nagusirik aukeratu.
Getxon, Susana Andollo González GUK hautagaitzako zinegotzi eta Hiritarren Kontseiluko kideak aise irabazi ditu barne-hauteskundeak, babesen %81,69gaz. Aurrean, Jose Antonio Moreno Marcos militantea izan du. Orain dela lau urte, Ignacio Robles Fernández suhiltzailea aukeratu zuten idazkari nagusia.
Leioan, Jose Ignacio Vicente Martínezek lortu du eskualdeko babes handiena: %84,62. Izan ere, errepikatu duen idazkari nagusi bakarra izan da. María Dolores Lozano Muñoz Esnatu Leioako zinegotzia zen alternatiba.
Sopelan, Manuela Ruiz Vivanco atxiki bako zinegotziak lortu du idazkaritza, botoen %55,60ri esker. Beste hautagaia zen Maria Luisa Gadea Nebreda langabetua.
Urdulizen, Verónica García García Denok Baterako zinegotziak metatu du botoen %80,00. María del Carmen Garaita Urdinguio etxekoandrea zen beste aukera.
Bost idazkaritzak dagozkie Ahal Duguk talde aktiboak dauzkan Uribe Kostako bost udalerriei. Hala, Berangon, Gorlizen eta Plentzian izandako taldeek ez dute alderdiaren onarpen ofizialik.
