Uribe Kostako primarioei dagokienez, Erandion Jorge González Berdintasun zinegotzia izango da alkategaia; Leioan, Juan Carlos Martínez bigarren alkateordea. Biak ala biak hautagai bakarrak izan dira udalerri horietan.
Getxon, ostera, urriaren 5erako beharrezko abalak lortuz gero alkategai biren arteko botazioa egin beharko dute militante sozialistek datorren urriaren 21ean, orain dela lau urte gertatu legez. Hautagaiak honako hauek dira: Luis Almansa, 1999 eta 2015 bitartean zinegotzi eta bozeramaile izandakoa; eta Carmen Díaz, 2007tik 2015era bitartean Erandioko zinegotzia izan zena. Horretaz gainera, Díaz Agus Ruiz Itzubaltzeta eta Areetako PSE-EEko idazkari nagusiaren emaztea da. Ruiz orain dela lau urte aurkeztu zen alkategaia izateko, baina Txefo Landak irabazi zuen barne-botazioa, %55 lortuta. Getxoko Udal Gobernuko Ingurumen zinegotzia da Landa, gaur egun.
Foru-primarioak
Modu berean, getxoztarrak ez ezik eskualde osoko afiliatu sozialistak deituko lituzke alderdiak, urriaren 21ean botoa eman dezaten, Diputaziorako zerrendaburu sozialista izateko hautagai biek abalak batzekotan. Kasu horretan, militanteek aukeran izango lituzkete Teresa Laespada Berdintasun eta Enplegurako foru-diputatua, EAJgaz koalizioan gobernatzen duena; eta Juan Manuel González PSE-EEren zuzendaritzako kide eta sektore kritikoko partaidea, EAJgaz sinatutako gobernu-akordioen aurka dagoena.