Abenduaren 10era arte zazpi zundaketa egingo dituzte, itsasadarraren azpian zer-nolako materiala dagoen jakiteko. Horren bidez, Ibaizabalen azpiko tunelaren trazadura eta eraikuntza-metodoa zehaztu gura dute. Izan ere, lan horiek eraikuntza-proiektua egin aurretik idatzi beharra dagoen bideragarritasun-azterlanaren barruan sartzen dira.
Unai Rementeria diputatu nagusiak obren aurkezpenean esandakoaren arabera, "Itsasadarraren azpiko tunela abian dago. Horrek ez du atzera egiterik. Aurreikuspenen arabera operatibo 2027an egongo den arren, gaur esan genezake tunel horren amaieran argia ikusteko apur bat gutxiago falta dela. Tunela funtsezkoa da itsasadarren bi aldeetarako eta Bizkairako; Artatzako errotonda eta Ballontiko ardatza batuko ditu. Eta irauli egingo du Bizkaiko mugikortasuna", azpimarratu zuen.
Rementeriak azaldu zuen itsasadarrean egingo diren lagin-hartzeak eta zundaketak urrats oso garrantzitsua direla: "Lagin-hartze horiei esker tunel biak non eraiki behar ditugun jakingo dugu. Trazadurak zirkulazio azkarra eta segurua bermatu behar du. Azkarra eta segurua. Eta lagin-hartze horiei esker, halaber, tunelak eraikitzeko erarik onenak ezagutuko ditugu. Nola egin. Zein teknika erabiliz", laburtu zuen.
Ibilgailu-pilaketen aurkako Plan Integrala
Aldundiaren arabera, Itsasadarraren azpiko tunela eta Hegoaldeko Saihesbidearen bigarren fasea "obra osagarri bi" dira, Bizkaiko metropoli-gunean "ibilgailu-pilaketen arazoari dagokionez irtenbide integrala eskainiko dutenak". Bi egitasmo horien aurrekontua, denera, 580 milioi eurokoa da. Hegoaldeko Saihesbidearen bigarren fasea 2023. urtearen inguruan egon daiteke abian eta tunela, arinen jota, 2027an.
Aldundiak egindako azterlan teknikoen arabera, egunero 53.000 ibilgailuk erabiliko lukete itsasadarraren azpiko tunela; Hegoaldeko Saihesbidearen kasuan, ostera, 24.000 ibilgailu izango lirateke. Bestalde, tunelak 41.000 ibilgailu kenduko lituzke Arrontegitik eta 38.000 La Avanzadatik. A8 autobideari dagokionez, 17.500 ibilgailu gutxiago pasatuko lirateke Max Center aldean.
