Kultura  Gorliz  Plentzia 2018-10-15 08:00

Alex Ygartua: "Herrian eta herritarrakaz egindako antzezlana da"

Kepa Ugarte Martiarena

Iaz "Plasentzia 1577" obrak izandako arrakastaren ostean, urriaren 20an eta 26an "Anton Garai kortsarioaren historia" herri-antzezlana taularatuko dute Plentzian eta Gorlizen. Kultura Elkarrekin Aurrera (KEA) elkarteak ekoiztuta eta Alex Ygartua gorliztarraren zuzendaritzapean, berriro ere udalerri bietako bizilagunak igoko dira agertokira.

Alex Ygartua: "Herrian eta herritarrakaz egindako antzezlana da"
Daborduko entseguak egiten dabiltza urriaren 20rako dena prest izateko. KULTURA ELKARREKIN AURRERA (KEA) | Ikusi handiago | Argazki originala

Lan handia egin duzue azken hilabeteetan antzezlana aurrera ateratzeko?

Bai, nahikotxo. Uda baino lehenago hasi ginen, eta oporraldiaren ostean, irailean, berriro ekin genion antzezlana. Orain azken ukituak ematen gabiltza.

Daborduko entseguakaz hasi zarete. Zelako itxura hartzen dabil antzezlana?

Nik uste dut antzezlana taularatzeko prest gaudela: herritar soilak izan arren, antzezleetariko batzuk euren kabuz eginda zeuzkaten antzerki-tailerrak. Horiek legez, aurretik interpretazioaren munduan ezertxo ere egin ez duten lagunek hortzez eta haginez defendatzen dituzte euren paperak. Horrenbeste jendek parte hartzen duen horrelako prozesuetan ez dago entsegu asko egiteko aukerarik; hala ere, oso ondo egiten dute. Alde batetik, musika egin dugu; beste alde batetik, eszenografia. Momentu honetan, horregaz guztiagaz "puzzle-lana" egiten gabiltza.    

Zaila izaten da esperientzia ez daukan jendeagaz antzezlan bat martxan ipintzea?

Aurten errazagoa izan da joan den urtean askok "Plasentzia 1577" antzezlana egin zutelako; ez gara hasieratik abiatu behar izan. Zer edo zer aurreratuta geneukan. Hala ere, joan den urtekoari errepasoa eginda, zail samarra da zerotik hasten den jendeagaz antzezlan bat martxan ipintzea; izan ere, hasiera batean, askok ez dute ondo ulertzen antzerkiaren hizkuntza edo entsegu bat zelan garatu behar den, berbarako. Orain ezberdina da, denek edo gehienek ezagutzen dute eszenarioa zein izango den. Hala ere, hasiberriak izan edo esperientzia eduki, jendeak borondate handia erakusten du hasiera-hasieratik; hori eskertu egiten da.

Zeintzuk dira herri-antzerkiaren onurak?

Komunitate edo herri berberetako kideak izan arren, antzerkiaren bitartez ohituta ez dauden modu batean hartu-emanetan hasten dira antzezlanean parte hartzen duten lagunek; energia ezberdin bat sortzen da. Oraingo honetan askoz gazte gehiago animatu da antzezlanean parte hartzea; polita da eurak baino nagusiagoak diren pertsonakaz lanean ikustea neska-mutilak.  

Zelanbaiteko zaletasuna piztu da Gorlizen eta Plentzian ekimen hauen bitartez?

Nik uste dut bazegoela; herri bietan dago kulturaren inguruan interes handia erakusten duen jendea. Horrelako ekimenek zaletasun hori bideratzeko aukera ematen diete herritarrei. Aldi berean, honek denak erakusten du askotan ez dugula lagun horiek dauzkaten interesak asetzeko behar bestelako lanik egiten.

Zer esango zenieke gainontzeko herritarrei antzezlana ikustera hurreratzeko?

Eszenografian, musikagintzan eta koreografian nahiko adituak diren lagunak dabiltza lanean; pauso bat aurrera egin dugu. Herrian eta herritarrakaz antzezlan handi bat egin dezakegula erakusten gabiltza aurten.

2018/10/26 20:30

Gorlizko Eleiz plaza Gorliz Plentzia

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa