Jon Enbeita Ealo bertsolariak jantziko dio txapela 2018ko Bizkaiko bertsolari txapeldunari. Finala zapatu iluntzean izango da Bilbon, 17:00etatik aurrera, Bilbao Arenan. Bizkaiko Bertsozale Elkarteko Talde Antolatzailearen erabakiz izango da Jon aurtengo txapela ipiniko duena.
1950ean jaio zen Jon, Muxikan. 3 urtegaz bere aita zen Balendin Enbeitak zuzendutako antzerki baten kopla bat kantatu zuen lehenengoz. Han hasi zuen ibilbide oparoa: bost bider kantatu du Txapelketa Nagusiko finalean (1980 –bigarren egin zuen-, 1982, 1986, 1989, 1993); beste bost bider izan da Bizkaiko finaletan, eta horietatik bi bider izan da Araba-Bizkaiko Txapeldun (1987, 1990 –txapeldun-, 1992 –txapeldun-, 1994, 1996). Bertso idatzietan ere sari ugari jaso ditu Jonek.Musikaren munduan ere ibilbide oparoa eduki du bere gitarra eskutan. 17-18 urtegaz hasi zen bere kontura gitarra ikasten, eta Euskal Herri osoan ibili da bakarlari moduan. Hainbat disko ere grabatu ditu, azkena, iaz.
Zapatuan Bilbao Arenako oholtzara igoko da Jon Enbeita, eta berak izango du 2018ko Bizkaiko Bertsolari Txapeldunari txapela jazteko ohorea.