Dena prest aste-akabuan Txalaparta Bira egiteko Algortatik Gorlizeraino

Txalaparta Biraren aurkezpena, joan den ekainean.

Algortako UKTEST taldeak antolatu du Txalaparta Bira, tresna tradizional hori eskualdean sustatzeko asmoz. Irailaren 7an (zapatua) herriz herri egingo dituzte erakustaldiak eta tailerrak, eta irailaren 8ko eguerdian amaituko dute bira, Gorlizen.

Aurkezpena egin zutenean Armintzaraino joango zirela iragarri bazuten ere, azkenik Gorlizen amaituko da Txalaparta Bira ekimena. Hasi, Algortan hasiko da, zapatu goizean. Telletxe plazan, zehazki. Goizeko 09:00etan emango dituzte lehen kolpeak zuraren gainean, eta ondoren Berangorantz abiatuko dira.

Berangon, Moreaga parkean egingo dute geldialdia, 09:40tik aurrera, eta ordubete geroago Larrabasterra izango da txalapartaren maitaleen topagunea. 11:00etan, berriz, Sopelako Udaletxe aurrean izango da hitzordua, Euskal Jaiaren egitarauaren barruan.

Eguerdi alderako Barrikarantz joko du Txalaparta Birak. Goierri auzoa izango da lehenengo geltokia, 12:40an; 13:45erako Udaletxe inguruan izango dira, eta hantxe egingo dute ere bazkaria, 14:45ean hasita. Bazkalostean Plentziara abiatuko dira, 16:30ean.

Ontziola plaza izango da Plentzian topagunea. 18:00etan tailerra egingo dute, eta 19:30ean txalapartaren laguntzagaz egindako poteoa hasiko da Alde Zaharrean. Ibilaldia domeka eguerdian ailegatuko da azken helmugara: Gorlizko Ibarreta plaza. Han, tailerra eskainiko dute 12:00etatik aurrera.

Erlazionatuak

Txalaparta Uribe Kostara zabaltzeko, Txalabira

Getxo

Uribe Kostako herri denetan txalapartaren aldeko kultura bultzatzeko Txalabira antolatu du Algortako UKTEST taldeak datorren irailaren 7rako. Algor...