HIRUKAk jakinarazi duenez, beharra duten pertsonei laguntzeko sareak osatzen hasi dira Getxon eta Urdulizen. Lehenengoaren kasuan, herritarren arteko zaintza modu kolektiboan egiteko aldarria egin dute, "zaintza erdigunean jarri eta modu kolektiboan antolatzeko". Azaldu dutenez, asko dira ekarpenak egiteko moduak, hala nola pertsona nagusiei erosketak eta errekaduakaz laguntzea. Hori dela eta, zeregin horietan laguntzeko jendea batzen hasi dira. Horretarako, helbide elektroniko bat jarri dute martxan Algortan: algortarrokzaintzen@gmail.com. Horretara boluntarioaren izen-abizenak, telefono zenbakia eta bizilekuaren kalea adierazi behar da. "Jasotako mezuekin sarea antolatzeko hurrengo urratsen berri emango dugu datozen egunetan", adierazi dute. Itzubaltzeta/Romon, aldiz, telefono zenbaki bat jarri dute: 661 252 204.
Urdulizkoen kasuan, sare sozialetan antzeko mezu bat zabaldu dute udalerriko hainbat kirol taldek. Gainera, gainontzeko herrietan ere norbanakoak antzeko mezuak zabaltzen hasi dira inguruko lagunei eta auzokideei laguntzeko asmoz.
@bmurduliz Si conoces alguna persona que necesite ayuda en #urduliz ó #uribekosta manda un privado pic.twitter.com/oUKFV09NL6
— Urdulizberri (@urdulizberri) March 14, 2020
Algortako sarea osatu gura duten pertsonakaz berba egin ondoren, azaldu digute une honetan sare horretan parte hartzeko prest daudenen kontaktuak jasotzen ari direla, ondoren funtzionamendua zelakoa izango den eta zeintzuk segurtasun- eta prebentzio-neurri mantenduko dituzten zehazteko. Horretarako, osasun-adituak diren pertsonakaz kontaktuan daude, hainbat kontu kontrastatzeko. Iragarri dutenez, asmoa da sarea datorren astean martxan jartzea.
Sopelan sopelazaintzen@gmail.com posta elektronikoko helbidea ipini dute martxan, beharra duenak idazteko.
