Koronabirusa Uribe Kostan

Martxan dago film laburren lehiaketa! Bidali zure maisulana!

Kaixo lagunok! Gauerdian amaitu da konfinamendu-sasoirako antolatu dugun film laburren lehiaketaren lehen txanda. Ordu horretara bitarte jasotako bideo guztiak gaurtik daude lehian. Batetik, HIRUKAren epaimahaiak, bideo-konferentzian bilduta, ahalik eta irizpiderik aldrebesenak erabilita eta inongo inpartzialtasunik gabe erabakiko du zein film duen gustukoen, eta saria emango dio, auskalo zer; bestetik, astebeteko epean (hurrengo egueneko gaueko 00:00etara arte) ikustaldi gehien dituen filmak ere saria irabaziko du. Baimenduta dago senide batek egindakoa behin eta berriro ikustea, oso ona ez izan arren (filmaz ari gara, ez senideaz).

Gaurtik aurrera jasotzen ditugun bideoek hurrengo asteko lehiaketan hartuko dute parte. Hemen dituzu arauak.

 

1. astea (martxoak 20-26):

 

 



Arauak

Honako arauak errespetatu beharko dituzu saria etxera eroan gura baduzu:

 

  • Berbarik badago, euskarazkoak izan behar dute
  • Iraupena, gehienez ere 5 minutukoa
  • Gaia, gura duzuna
  • Komuneko paperak agertu behar du (ez esan agortu zaizula!)
  • Galarazita dago “koronabirus” berba erabiltzea

Astero egingo dugu lehiaketa, eta irabazle bi egongo dira. Bata HIRUKAren epaimahaiak erabakiko du (hau da, ez du inongo sinesgarritasunik edukiko), eta bestea astebetean ikustaldi gehien lortzen duena izango da. Eguena izango da astero lanak bidaltzeko azken eguna (martxoaren 26an hasita).

 

Helbide honetara bidali behar dituzue zuen maisulanak: foto@hiruka.eus

 

Jasotako bideoak HIRUKAren webgunean ikusbide egongo dira, eta inork Oscar saria irabaztekotan dirua erdibana egingo dugu, axola ez badizue.

 

Ixo, kamera, ekin!

Erlazionatuak

Aspertuta? Egin bideoa etxean eta irabazi sari ederrak!

Uribe Kosta

Bai, badakigu, ez duzu egun osoa kirolean emango, hori ere ez da ona. Horregatik, beste proposamen bat dakarkizugu: etxean grabatutako film laburre...