"Konfinamendua non, nagikeria han", dio esaera zahar ezagunak. Lehiaketaren bigarren aste honetarako hiru bideo baino ez dira ailegatu gure erredakzio birtual berrira, hirurak eder-ederrak hori bai: Egipto, Kontuz eta Konfina D´or. Bejondeiela egileei. Haien artetik aterako dira gaur zortzi ezagutaraziko ditugun saridun biak. Joan den astekoak nortzuk izango diren, berriz, laster esango dugu.
Gaurtik aurrera bidalitako lanak, noski, hirugarren asteko txandan sartuko dira (bai, zoritxarrez hirugarren txanda ere egingo dugulakoan gaude). Askok esan digute badabiltzala, azken ukitua ematen ari direla, post-produkzioa konplikatu zaiela... Ejem, ejem. Hala bedi. Bitartean, ohar bat: onartzen da ekoiztetxe berak lan bat baino gehiago bidaltzea. Lehenengoa eginez gustura ibili bazinen, animatu eta ez geratu bigarrena egiteko gogoz!
2. astea (martxoak 26-apirilak 2):
Arauak
Honako arauak errespetatu beharko dituzu saria etxera eroan gura baduzu:
- Berbarik badago, euskarazkoak izan behar dute
- Iraupena, gehienez ere 5 minutukoa
- Gaia, gura duzuna
- Komuneko paperak agertu behar du (ez esan agortu zaizula!)
- Galarazita dago “koronabirus” berba erabiltzea
Astero egingo dugu lehiaketa, eta irabazle bi egongo dira. Bata HIRUKAren epaimahaiak erabakiko du (hau da, ez du inongo sinesgarritasunik edukiko), eta bestea astebetean ikustaldi gehien lortzen duena izango da. Eguena izango da astero lanak bidaltzeko azken eguna (martxoaren 26an hasita).
Helbide honetara bidali behar dituzue zuen maisulanak: foto@hiruka.eus
Jasotako bideoak HIRUKAren webgunean ikusbide egongo dira, eta inork Oscar saria irabaztekotan dirua erdibana egingo dugu, axola ez badizue.
Ixo, kamera, ekin!
