Herriko tabernak itxi eta konfiskatzeko prozesua hasi du Espainiako Justiziak

Hegoalde eta Egoki herriko tabernen aldeko elkarretaratzea, artxiboko irudian.

Herritarren konfinamendu bete-betean, Espainiako Auzitegi Nazionalak Herriko taberna eta elkarteen epaia exekutatzen hasi dela salatu du Sortuk. Zehazki, taberna eta elkarteen kontu korronteak enbargatzeko agindua eman du auzitegiak.

2015ean Espainiako Auzitegi Gorenak 35/02 auziko epaia ezarri zuen, ezker abertzalearekin lotura duten 107 taberna eta kultur elkarte itxi eta konfiskatzeko Auzitegi Nazionalak emandako agindua berretsiz. Ordutik ez da mugimendu askorik izan, baina, Sortuk informatu duenez, azken egunotan taberna eta elkarte horietako batzuek jakinarazpenak jaso dituzte epaia betetzera doazela aditzera ematen dutenak.

Epaiaren exekuzioa, beraz, kontu korronteak enbargatzen hasi dute eta Sortuko kide batek adierazi digunez, "herri batzuetan epaiarekin zerikusirik ez zuten kontu korronteak ere ikutu dituzte, nahastuta edo".

Sortuk salatu duenez "1936ko gerraz geroztik, lapurreta ekonomiko eta politikorik handiena" izango da. Koronabirusa dela-eta Espainiako Gobernuak gerra hotsak erabiltzen ari dela dio alderdi independentistak, "Guardia Zibil eta militarrak osasun krisiaren aurkako propagandaren lehen lerroan jarrita, baina iraganekoa behar lukeen epai honek gogora dakarkigu Espainiako Erreinuaren autoritarismoa ez dela berria zoritxarrez".

"Dena da ETA"ri lotutako enegarren epaia

785 orriko epaian, Herriko tabernak eta elkarteak konfiskatzeko agintzearekin batera, epaileak aurrez eskatutako hiru urteko kartzela zigorra murriztu zieten epaiketa hamarkada bat baino gehiago luzatu zelako, eta urte bat eta 10 hilabetera zigortu dute ezker abertzaleko Joseba Permach, Rufi Etxeberria, Karmelo Landa eta Juan Kruz Aldasororekin batera. Floren Aoiz, Antton Morcillo eta Jon Gorrotxategiri urte eta erdiko kartzela zigorra ezarri zieten. Azkenik, beste hamabi lagun urtebete eta hiru hilabetera zigortu zituzten Herriko tabernen zatiagatik. Ez zuen inork kartzelara joan beharrik izan.

Argia aldizkaritik hartu dugu artikulu hau, Creative Commons-en CC BY SA lizentzia baliatuta. Ikusi hemen jatorrizko artikulua.

Uribe Kostako honako elkarteak aipatzen zituen Espainiako Auzitegi Gorenak 35/02 auziko epaian: Algortako Gorrondatxe, Altzagako Hegoalde, Astrabuduko Erandioztarrak, Berangoko Sei-herri, Itzubaltzeta/Romoko Branka, Leioako Kurkudi, Sopelako Mikelats, eta Urdulizko Iretargi.

Erlazionatuak

Gorrondatxe LIBRE! Aurrera ABIAN!

Erabiltzailearen aurpegia Getxo

35/02 sententziaren baitan, Entzutegi Nazionalak hainbat kultur elkarteren kontuak enbargatzeari ekin dio. Honen aurrean Abian Kultur Elkarteak zer...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun