Hondartzen erabilera-ordutegia ohikoa izango da, 11:00etatik 20:00etarakoa. Bitarte horretan ezin izango da kirolik egin (palak, boleibola...), "osasun-arloko agintariek une bakoitzerako ezarritako segurtasun-tartea gordetzearren". Aldundiak gaineratu duenez, "agintari horiek zehaztuko dute zenbat pertsona joan daitezkeen talde batean hondartzara, eta talde horiek errespetatu egin beharko dituzte distantzia soziala dela-eta unean-unean ezarrita dauden gomendioak".
Bestalde, lehenengo aste bietan zigilatuta egongo dira iturriak, dutxak eta oinak garbitzeko txorrotak. Ondoren, berriro aztertuko da horiek erabiltzeko aukera ote dagoen, betiere indarrean dauden osasun-arauak eta gomendioak errespetatuta.
Erabiltzaileen errotazioa sustatu gura dute Aldundiak eta Udalek. Honenbestez, hondartzetara doazenek asko jota hiru ordu eman ahal izango dituzte bertan. Gainera, eguzkitakorik, aulkirik eta koltxonetarik ez eroatea gomendatu dute, pertsona bakoitzak ahalik eta leku txikiena okupatzeko.
Okupazioa adierazteko hiru kolore
Hondartzainek eta sorosleek hondartza bakoitzean zenbat jende dagoen neurtuko dute. Okupazio-maila kolorez adieraziko da: berdea, egokia bada; beilegia edo anbarra, hondartza nahiko beteta badago; eta gorria, guztiz betez gero. Kolore horiek erabiliko dira erabiltzaileei une oro jakinarazteko zein den hondartza bakoitzaren egoera. Hondartzan bertan, anbar koloreko bandera ipiniko da han daudenek jakin dezaten betetzen ari dela (megafoniaz ere adieraziko da) eta modu ordenatuan irteten hasteko.
Gainera, Aldundiaren webguneko hondartzen atalean eta BizkaiUp aplikazio berrian ere koloreen bidez jakinaraziko da egoera zelakoa den. Hondartza batera joan aurretik horietan kontsulta egiteko eskatu diete herritarrei, okupazio-maila egokia ote den jakiteko. "Hondartzainak eta sorosleak beti egongo dira harremanetan udalekin", gaineratu du Aldundiak, "gehieneko edukierara heltzen denean zer neurri hartu behar diren erabakitzeko; kasu horretan, udaltzainak eta ertzainak arduratuko dira araudia betearazteaz".
Azkenik, zehaztu dute adostutako arau-esparru orokor hori hondartza bakoitzaren ezaugarri berezietara egokitzeaz arduratuko direla udal-teknikariak, Aldundikoen laguntzagaz.
