Gaur publiko egin den ebazpenaren ondorioz, 5.000 biztanletik beherako udalerri txikiek ere neurri bereziak ezarri beharko dituzte bertako intzidentzia metatua 500 kasutik gorakoa denean. Kontuak horrela, bihartik aurrera, Eusko Jaurlaritzako Osasun Sailak ezarritako hurrengo neurriak indarrean sartuko dira Lemoizen, Plentzian eta Urdulizen: ostalaritza-eta jatetxe-establezimenduak eta joko- eta apustu-establezimenduak itxi egingo dira; era berean, taldeko kirol-jarduera etengo da.
Horrez gainera, gogoratu beharra dago indarrean dauden murrizketei eutsi behar zaiela, hala nola etxeratze-agindua 22:00etatik 06:00etara, merkataritza- eta kultura-jarduerak bertan behera uzteko gehieneko ordutegia 21:00etan finkatuta dagoela, eta musika- eta ahots-entseguak eta emanaldiak bertan behera daudela, besteak beste.
